جنوبی وزیرستان اور بنوں میں سیکورٹی فورسز پر حملوں میں 4 اہلکار ہلاک، 5 زخمی

واشنگٹن (ش ح ط) صوبہ خیبر پختونخوا کے قبائلی ضلع جنوبی وزیرستان کی تحصیل سراروغہ میں چیک پوسٹ پر شدت پسندوں کے حملے میں پاکستانی سیکورٹی فورسز کے 2 اہلکار ہلاک اور 3 زخمی ہوگئے۔ جبکہ بنوں میں کانوائے پر حملے میں دو اہلکار ہلاک اور دو زخمی ہوگئے۔

سرکاری ذرائع نے ڈیلی اردو کو بتایا کہ جنوبی وزیرستان میں شدت پسندوں کے حملے سپاہی حسنین اور مجاہد ہلاک جبکہ سپاہی ساجد، حمید اور صغیر زخمی ہوئے ہیں۔

سرکاری ذرائع کے مطابق لاشوں اور زخمیوں کو فوری طور پر قریبی اسپتال منتقل کر دیا گیا۔

ادھر بنوں میں تھانہ ڈومیل کی حدود میں منگل میلہ کے قریب سیکیورٹی فورسز کے کانوائے کو بارودی مواد کے دھماکے سے نشانہ بنایا، جس کے نتیجے میں سیکیورٹی فورسز کے دو اہلکار ہلاک اور دو اہلکار زخمی ہوگئے۔

واقعے کے بعد پولیس اور سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

پاکستانی فوج کے شعبہ تعلقاتِ عامہ آئی ایس پی آر نے تاحال ان واقعات پر کوئی بیان جاری نہیں کیا ہے۔

دوسری جانب کالعدم تحریک طالبان پاکستان نے حملے کی ذمہ داری قبول کرنے کا دعوی کیا ہے۔