جنوبی وزیرستان اپر میں 7 پولیس اہلکار اغواء – سرچ آپریشن جاری

جنوبی وزیرستان اپر (ڈیلی اردو) جنوبی وزیرستان اپر کے دو مختلف علاقوں، لدھا اور سرویکئی کی حدود میں پولیس اہلکاروں کے اغواء کے دو الگ الگ واقعات نے سیکیورٹی اداروں کو چوکنا کر دیا۔ اطلاعات کے مطابق تھانہ لدھا کی حدود میں معمول کی گشت پر مامور تین اہلکار—انصاف، عابد اور اسماعیل—کو نامعلوم افراد نے اغواء کر لیا۔

اسی روز تھانہ سرویکئی کی حدود میں واقع تانگہ چگملائی کے مقام سے چار اہلکار—سب انسپکٹر عبد الخالق، سپاہی عرفان اللہ، سپاہی حبیب اللہ اور سپاہی عمران—کو بھی اغواء کیا گیا۔

پولیس حکام نے واقعات کی تصدیق کرتے ہوئے بتایا ہے کہ اغواء شدہ اہلکاروں کی تلاش کے لیے سرچ آپریشن جاری ہے، تاہم تاحال کوئی حتمی سراغ نہیں ملا۔ مقامی ذرائع سے بھی معلومات اکٹھی کی جا رہی ہیں۔ تاحال کسی گروپ نے ان وارداتوں کی ذمہ داری قبول نہیں کی۔

علاقے میں خوف کی فضا ہے جبکہ مقامی لوگوں نے پولیس اہلکاروں کے اغواء پر شدید تشویش اور افسوس کا اظہار کیا ہے۔