جنوبی وزیرستان: رات کی تاریکی میں طالبان اسنائپرز نے پاکستانی فوجیوں کو نشانہ بنایا، ویڈیو جاری

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان کے علاقے بدر ویلی میں 12 اور 13 ستمبر کی درمیانی رات کو فوجی اہلکاروں پر شدید حملہ ہوا، جس میں 12 اہلکار ہلاک ہوگئے۔ کالعدم تحریک طالبان پاکستان (ٹی ٹی پی) نے حملے کی ذمہ داری قبول کرتے ہوئے اسلحہ قبضے میں لینے کا دعویٰ کیا ہے۔

ٹی ٹی پی نے اس حملے کی ویڈیو بھی جاری کی ہے، جس میں دیکھا جا سکتا ہے کہ اہلکاروں کو رات کی تاریکی میں اسنائپر گن سے ایک ایک کر کے نشانہ بنایا گیا۔ 

ویڈیو میں نائٹ وژن ڈیوائسز (NVD) اور تھرمل دوربین استعمال ہوتے ہوئے نظر آتی ہیں، جو رات میں ہدف کے انسانی جسم کے درجۂ حرارت سے مقام معلوم کرنے میں مدد دیتی ہیں۔

پاکستانی سیکورٹی حکام کے مطابق، طالبان کے پاس موجود جدید اسلحہ، بشمول نیٹو کے افغانستان سے چھوڑے گئے ‘ایم-24 ایس ڈبلیو ایس’ جیسی اسنائپر رائفلز، 800 میٹر سے ایک کلومیٹر تک دور سے نشانہ لگانے کی صلاحیت رکھتی ہیں۔ ان اسلحوں کی موجودگی کی وجہ سے پاکستانی فوج، پولیس اور دیگر سیکورٹی اہلکاروں کے لیے خطرہ اور زیادہ بڑھ گیا ہے۔

اسنائپر حملے، خاص طور پر گوریلا جنگ میں، بہت اہمیت کے حامل ہیں کیونکہ یہ حملہ آور کو دشمن کی نظر سے چھپ کر، دور سے مؤثر حملہ کرنے کی سہولت فراہم کرتے ہیں۔ سیکورٹی حکام کا کہنا ہے کہ طالبان کے پاس یہ جدید ترین اسلحہ فوجی اہلکاروں کے لیے انتہائی خطرناک ہے۔