جنوبی وزیرستان میں دھماکا، ایک ہی خاندان کے 3 بچے ہلاک، 2 زخمی

وانا (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان لوئر کی تحصیل وانا کے علاقے غوا خوا میں رات گئے ایک موٹرسائیکل میں نصب دھماکہ خیز مواد پھٹنے سے ایک ہی خاندان کے تین بچے ہلاک جبکہ دو زخمی ہو گئے۔

پولیس کے مطابق دھماکہ صدام حسین کے گھر کے باہر کھڑی موٹرسائیکل میں ہوا۔ ابتدائی اطلاعات کے مطابق ایک نامعلوم شخص موٹرسائیکل گھر کے باہر کھڑی کر کے گیا تھا، جس کے کچھ دیر بعد زوردار دھماکہ ہوا۔

واقعے میں ہلاک ہونے والوں میں 15 سالہ شاہ حسین ولد حسن، 7 سالہ سنایا بی بی دختر صدام حسین اور 8 سالہ سورین بی بی دختر صدام حسین شامل ہیں، جبکہ دو بچے شدید زخمی ہوئے۔ زخمیوں کو فوری طور پر ہیڈکوارٹر ہسپتال وانا منتقل کر دیا گیا ہے جہاں انہیں طبی امداد دی جا رہی ہے۔

پولیس اور سیکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں اور واقعے کی مختلف پہلوؤں سے تحقیقات جاری ہیں۔

علاقہ مکینوں نے اس افسوسناک واقعے پر شدید غم و غصے کا اظہار کرتے ہوئے ذمہ دار عناصر کو فوری طور پر گرفتار کر کے سخت سزا دینے کا مطالبہ کیا ہے۔