جنوبی وزیرستان میں سیکورٹی فورسز نے دہشت گردی کا بڑا منصوبہ ناکام بنا دیا

وانا (د م و) پاکستان کے قبائلی ضلع جنوبی وزیرستان میں سیکیورٹی فورسز نے ایک بڑے دہشت گرد حملے کو ناکام بنادیا۔ حکام کے مطابق کارروائی تیئرزہ گیٹ فورٹ کے قریب ہوئی، جہاں ایک مشکوک گاڑی کو روک کر تلاشی لی گئی۔

ابتدائی اطلاعات کے مطابق گاڑی میں ڈیڑھ ٹن سے زائد بارودی مواد چھپایا گیا تھا، جسے دہشت گرد ممکنہ طور پر بڑے پیمانے پر حملے کے لیے استعمال کرنے والے تھے۔ فورسز کی فوری کارروائی اور مہارت کے باعث کسی جانی نقصان کی اطلاع نہیں ملی۔

بم ڈسپوزل ٹیم نے گاڑی میں نصب تمام سرکٹس ناکارہ بنا دیے اور علاقے کو کلیئر قرار دیا۔ سیکیورٹی حکام نے بتایا کہ یہ کارروائی پیشگی معلومات اور انٹیلی جنس کی بنیاد پر عمل میں آئی۔

واقعے کے بعد علاقے میں سیکیورٹی بڑھا دی گئی ہے اور مزید تحقیقات جاری ہیں تاکہ اس واردات کے پیچھے موجود شدت پسند گروپوں کی شناخت کی جا سکے۔