جنوبی وزیرستان میں سیکیورٹی فورسز کی گاڑی پر دھماکا، 10 پاکستانی اہلکار ہلاک، 8 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان اپر  کی تحصیل سرویکئی کے علاقے مولے خان سرائے میں سیکیورٹی فورسز کی گاڑی کو بم دھماکے کا نشانہ بنایا گیا، جس کے نتیجے میں کم از کم 10 اہلکار ہلاک اور 8 زخمی ہو گئے۔

پولیس کے مطابق دھماکے کے فوری بعد امدادی ٹیمیں جائے وقوعہ پر پہنچ گئیں اور زخمیوں کو قریبی اسپتال منتقل کر دیا گیا ہے۔ زخمی اہلکاروں میں سے بعض کی حالت تشویشناک بتائی جاتی ہے۔

پولیس حکام نے بم دھماکے کی تصدیق کرتے ہوئے کہا ہے کہ واقعے کے بعد علاقے کو گھیرے میں لے کر سرچ آپریشن شروع کر دیا گیا ہے جبکہ شواہد اکھٹے کرنے کا عمل بھی جاری ہے۔ 

حکام کا کہنا ہے کہ مزید تحقیقات مکمل ہونے کے بعد واقعے کی نوعیت کے بارے میں تفصیل سامنے لائی جائے گی۔

اس حملے کی ذمہ داری کالعدم تحریک طالبان پاکستان (ٹی ٹی پی) نے قبول کرنے کا دعویٰ کیا ہے۔ تنظیم کی جانب سے جاری بیان میں کہا گیا ہے کہ ان کے جنگجوؤں نے فورسز کی گاڑی کو نشانہ بنایا۔

جنوبی وزیرستان طویل عرصے سے عسکریت پسندوں کے حملوں کا مرکز رہا ہے۔ حالیہ برسوں میں سیکیورٹی فورسز کی کارروائیوں کے باوجود وقفے وقفے سے شدت پسندوں کے حملے جاری ہیں، جن میں سیکیورٹی اہلکاروں کے ساتھ ساتھ مقامی آبادی بھی متاثر ہو رہی ہے۔