جنوبی وزیرستان میں فائرنگ، پولیس اہلکار سمیت 2 افراد ہلاک

وانا (د م و) صوبہ خیبر پختونخوا کے قبائلی ضلع جنوبی وزیرستان کی تحصیل وانا کے علاقے باغ نارائی میں موٹرسائیکل پر نامعلوم مسلح افراد کی فائرنگ سے پولیس اہلکار سمیت دو افراد ہلاک ہوگئے۔

تفصیلات کے مطابق جنوبی وزیرستان کے علاقے باغ نارائی میں چلتی موٹرسائیکل پر فائرنگ کی گئی جس کے نتیجے میں پولیس کانسٹیبل صدام وزیر عرف جیوے اور بازور خان دوتانی ہلاک ہوگئے۔

پولیس ذرائع کا کہنا ہے کہ دونوں افراد کی نعشیں اعظم ورسک بازار سے 8 کلومیٹر دور زرملن اور کژہ پنگہ کے سنگھم پر واقع باغ نارائی کے علاقہ باغ نارائی سے برآمد کی گئی ہیں۔ تاہم دونوں کے قتل کی وجہ تاحال معلوم نہیں ہوسکی۔ پولیس نے واقعہ کی تحقیقات شروع کردی ہے۔

واضح رہے کہ دو دن قبل جنوبی وزیرستان کے رستم بازار وانا سے نیاز برکی نامی شخص کو دن دیہاڑے نامعلوم مسلح افراد نے اٹھایا تھا، جن کی لاش تین گھنٹے بعد تحصیل برمل کے علاقہ سے برآمد ہوئی تھی۔ اس واقعہ کا تاحال کوئی سراغ نہیں مل سکا، بدامنی کے ان واقعات کے بعد ایک بار پھر وانا میں خوف کی فضاء پیدا ہوگئی ہے۔

ذرائع کا کہنا ہے کہ کانسٹیبل صدام وزیر اور بازور خان دوتانی موٹر سائیکل پر زرملن جارہے تھے کہ راستے میں دونوں کو نامعلوم افراد نے چلتی موٹرسائیکل پر فائرنگ کرکے قتل کردیا گیا ہے۔

پولیس حکام نے اس حوالے بتایا کہ واقعے کی مکمل تحقیقات جاری ہے۔