جنوبی یمن میں ایس ٹی سی نے تیل کے ذخائر پر کنٹرول حاصل کر لیا، عدن کے ہوائی اڈے پر افراتفری

صنعاء (ڈیلی اردو ) یمن میں متحدہ عرب امارات کی حمایت یافتہ سدرن ٹرانزیشنل کونسل (ایس ٹی سی) نے ملک کے جنوبی حصوں، خاص طور پر تیل سے مالا مال حضرموت صوبے میں اپنا کنٹرول کافی حد تک بڑھا لیا ہے، جس سے حوثی مخالف اتحاد میں دراڑ پڑنے کا خدشہ ہے۔ 

پیر 12 دسمبر کو یمن کی فضائی حدود مختصر وقت کے لیے بند کر دی گئیں کیونکہ سعودی قیادت والے اتحاد نے پروازوں کے لیے مطلوبہ اجازت نامے جاری نہیں کیے۔ ایک یمنی سرکاری عہدیدار کے مطابق یہ اقدام STC کی حالیہ کارروائیوں، بشمول حضرموت کے بڑے حصے پر قبضے، کے خلاف سعودی پیغام تھا۔ اس دوران جنوبی شہر عدن کے ہوائی اڈے پر پروازیں معطل ہو گئیں، جس سے سینکڑوں مسافر متاثر ہوئے، تاہم بعد میں پروازوں کا عمل بحال کر دیا گیا۔

ایس ٹی سی، جسے متحدہ عرب امارات کی مالی اور تربیتی حمایت حاصل ہے، نے سیئون شہر، تیل کے اہم ذخائر اور توانائی کی تنصیبات پر قبضہ کر لیا اور حکومتی عمارات پر جنوبی یمن کا جھنڈا لہرا دیا ہے۔ اس نے اپنے کنٹرول کو عمان کی سرحد سے ملحق المہرہ صوبے تک بڑھا دیا ہے۔ ایس ٹی سی کے حامی جنوبی یمن میں آزاد ریاست کے قیام کا مطالبہ کر رہے ہیں، جیسا کہ 1967 سے 1990 تک تھا۔

حکومت کی طرف سے صدراتی کونسل کے چیئرمین رشاد العلیمی نے ایس ٹی سی سے مطالبہ کیا ہے کہ وہ حالیہ مقبوضہ علاقوں سے دستبردار ہو جائیں اور خبردار کیا ہے کہ یکطرفہ اقدامات ریاست کی قانونی حیثیت کو نقصان پہنچا سکتے ہیں۔ 

تجزیہ کاروں کے مطابق ایس ٹی سی کی یہ پیش رفت یمن میں طاقت کے توازن میں بڑی تبدیلی کے مترادف ہے اور خطے پر گہرے اثرات مرتب کر سکتی ہے۔