حوثیوں کا بیلسٹک میزائل اسرائیل میں فضائی دفاعی نظام نے مار گرایا

تل ابیب (ڈیلی اردو/رائٹرز ) اسرائیلی فوج نے اعلان کیا ہے کہ یمن کے حوثی باغیوں کی جانب سے فائر کیا گیا بیلسٹک میزائل فضا میں ہی اسرائیل کے فضائی دفاعی نظام نے ناکارہ بنا دیا۔

عالمی خبر رساں ادارے ’رائٹرز‘ کے مطابق حوثی گروہ نے اس حملے کی ذمہ داری قبول کی اور بتایا کہ انہوں نے اسرائیل کے خلاف تین کارروائیاں کی ہیں، جن میں بین گوریون ایئرپورٹ کی جانب ایک بیلسٹک میزائل فائر کرنا بھی شامل ہے۔ یہ دعویٰ حوثی گروپ کے فوجی ترجمان یحییٰ سَریع نے جمعے کے روز ایک ٹی وی بیان میں کیا۔

اسرائیلی فوج کے مطابق حملے کے دوران کوئی جانی نقصان نہیں ہوا اور فضائی دفاعی نظام نے میزائل کو بروقت مار گرایا۔

حوثی گروہ، جو ایران کی حمایت یافتہ ہے اور یمن کے اہم علاقوں پر قابض ہے، اسرائیل پر حملے کرتا رہا ہے اور تجارتی جہاز رانی میں رکاوٹیں بھی پیدا کر رہا ہے۔ گروہ کا کہنا ہے کہ یہ حملے غزہ میں فلسطینی عوام کے ساتھ یکجہتی کے اظہار کے طور پر کیے جا رہے ہیں۔