خاران: بلوچ عسکریت پسندوں کا پولیس تھانے پر حملہ، قیدی رہا، بینکوں کو نقصان

کوئٹہ (ڈیلی اردو) پاکستان کے شورش زدہ صوبے بلوچستان کے ضلع خاران کے مرکزی شہر میں جمعرات کے روز بلوچ عسکریت پسندوں کی بڑی تعداد داخل ہو گئی، جنہوں نے شہر کے مختلف حصوں میں منظم حملے کیے۔ 

مقامی حکام کے مطابق عسکریت پسندوں نے سٹی پولیس تھانے پر دھاوا بولا اور سرکاری و نجی بینکوں کو بھی نقصان پہنچایا۔

عینی شاہدین کے مطابق کالعدم بلوچ لبریشن آرمی کے درجنوں عسکریت پسند گاڑیوں اور موٹر سائیکلوں پر سوار ہو کر شہر میں داخل ہوئے، جس کے بعد فائرنگ اور دھماکوں کی آوازوں سے پورے شہر میں خوف و ہراس پھیل گیا۔

پولیس کے ایک سینیئر اہلکار نے نام ظاہر نہ کرنے کی شرط پر بتایا کہ حملے میں پولیس اہلکاروں کو جانی نقصان نہیں ہوا، تاہم سٹی پولیس تھانے میں کھڑی سرکاری گاڑیوں اور اسلحے کو نقصان پہنچایا گیا۔ اہلکار کے مطابق بلوچ عسکریت پسند تھانے سے کچھ اسلحہ بھی اپنے ساتھ لے گئے جبکہ حوالات میں موجود زیرِ سماعت قیدیوں کو زبردستی رہا کرا کے اپنے ہمراہ لے گئے۔

پولیس کے مطابق عسکریت پسندوں میں سے کچھ افراد بازار میں داخل ہوئے، جہاں انہوں نے دو سے تین بینکوں کو نشانہ بنایا۔ متاثر ہونے والے بینکوں میں نیشنل بینک آف پاکستان، میزان بینک اور بینک الحبیب شامل ہیں۔ فوری طور پر یہ واضح نہیں ہو سکا کہ عسکریت پسند بینکوں سے رقم لے جانے میں کامیاب ہوئے یا نہیں۔

سول ہسپتال خاران کے میڈیکل سپرنٹنڈنٹ ڈاکٹر مشتاق نے بتایا کہ ڈسٹرکٹ ہیڈکوارٹر ہسپتال میں پانچ زخمیوں کو لایا گیا۔ ان کے مطابق ایک نوجوان گولی لگنے سے زخمی ہوا جبکہ چار بچے دھماکے کے نتیجے میں اسپلنٹرز لگنے سے زخمی ہوئے۔

شہر کے رہائشیوں کے مطابق بلوچ عسکریت پسندوں کی بڑی تعداد میں شہر میں داخلے کے باعث کاروباری مراکز بند ہو گئے اور لوگ گھروں میں محصور ہو کر رہ گئے۔

خاران شہر کوئٹہ سے تقریباً 300 کلومیٹر جنوب مغرب میں واقع ہے اور اس کی آبادی مختلف بلوچ قبائل پر مشتمل ہے۔ ضلع خاران کا شمار بلوچستان کے شورش زدہ علاقوں میں ہوتا ہے۔ اگرچہ اس علاقے میں ماضی میں بدامنی کے واقعات پیش آتے رہے ہیں، تاہم مرکزی شہر میں بلوچ عسکریت پسندوں کا اس پیمانے پر داخل ہونا اور بیک وقت متعدد اہداف کو نشانہ بنانا اپنی نوعیت کا پہلا بڑا واقعہ قرار دیا جا رہا ہے۔