خامنہ ای سمیت ایران کی اہم شخصیات کو ہلاک کرنا میرے لیے اعزاز ہے، امریکی صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایرانی قیادت کو مارنا ان کے لیے اعزاز کی بات ہے اور انہوں نے ایرانی رہنماؤں کو سخت الفاظ میں تنقید کا نشانہ بنایا۔

انہوں نے واشنگٹن میں آدھی رات کے بعد سوشل میڈیا پر لکھا، ’’وہ (ایرانی قیادت) 47 برس سے دنیا بھر میں بے گناہ لوگوں کو مار رہے تھے اور اب میں، امریکہ کا 47 واں صدر، انہیں مار رہا ہوں۔ انہوں نے کہا کہ یہ میرے لیے بڑا اعزاز ہے۔‘‘

امریکہ اور اسرائیل کی جانب سے 28 فروری کو شروع کی گئی جنگ کے بعد ایران کے طویل عرصے تک سپریم لیڈر رہنے والے علی خامنہ ای سمیت متعدد اہم ایرانی رہنما اور فوجی کمانڈر ہلاک ہو چکے ہیں۔

ٹرمپ نے جنگ کی کامیابی پر سوال اٹھانے والی میڈیا رپورٹوں کو بھی تنقید کا نشانہ بنایا اور کہا کہ ان خبروں سے غلط تاثر ملتا ہے کہ امریکہ جنگ نہیں جیت رہا۔ انہوں نے کہا کہ ایران کی فوج کو بری طرح تباہ کیا جا رہا ہے اور اس کی قیادت کو ختم کر دیا گیا ہے۔

امریکی صدر نے اپنے سوشل میڈیا پلیٹ فارم ٹروتھ سوشل پر لکھا کہ امریکہ کے پاس بے مثال عسکری طاقت، لامحدود گولہ بارود اور کافی وقت موجود ہے۔

ادھر امریکی وزیر دفاع پیٹ ہیگسیتھ نے کہا کہ جمعہ کو ایران پر اب تک کی جنگ میں سب سے زیادہ شدید بمباری کی جائے گی۔ انہوں نے جمعے کے روز پریس کانفرنس میں کہا کہ آج تہران کی فضاؤں میں امریکہ کی جانب سے حملوں کی تعداد پہلے سے کہیں زیادہ ہوگی۔