خضدار میں دھماکا، صحافی کے بیٹے سمیت دو افراد ہلاک

کوئٹہ (ڈیلی اردو) صوبہ بلوچستان کے ضلع خضدار میں دھماکے کے نتیجے میں 2 افراد ہلاک اور 8 زخمی ہوگئے۔

لیویز فورس کے مطابق دھماکا خضدار کے علاقے دو تلوار چوک پر ہوا جس میں مقامی صحافی واحد شاہوانی کے بیٹے نوید شاہوانی سمیت دو افراد ہلاک اور 8 زخمی ہوگئے۔

لیویز حکام کے مطابق دھماکے کے بعد پولیس اور لیویز نے علاقے کو گھیرے میں لے لیا جبکہ زخمیوں کو ریسیکیو کر کے ہسپتال منتقل کردیا گیا۔

واضح رہے خضدار میں ہونے والے بم دھماکے کی کسی تنظیم نے تاحال ذمہ داری قبول نہیں کی، سکیورٹی اداروں نے ذمہ داروں کا تعین کرنے کیلئے تحقیقات شروع کر دی ہیں۔

ادھر وزیر اعلیٰ بلوچستان میر عبدالقدوس بزنجو نے خضدار بم دھماکے اور صحافی عبدالواحد شاہوانی کے صاحبزادے سمیت دو افراد کے ہلاکت پر دکھ اور افسوس کا اظہار کیا۔

عبدالقدوس بزنجو نے کہا کہ دہشت گرد معصوم شہریوں کو بربریت کا نشانہ بنا رہے ہیں تاکہ دہشت و وحشت کی فضا پیدا کر کے صوبے کو عدم استحکام سے دو چار کرنے کی سازش ناکام بنائیں گے۔