خضدار میں پولیس کی گاڑی کے قریب دھماکا، 2 اہلکار ہلاک، 3 زخمی

کوئٹہ (ڈیلی اردو) صوبہ بلوچستان کے ضلع خضدار میں پولیس کی گاڑی کے قریب دھماکے میں 2 اہلکار ہلاک اور تین زخمی ہوگئے۔

پولیس کے مطابق خضدار میں جھالاوان کمپلیکس کے قریب گشت کے دوران پولیس کی گاڑی کے قریب دھماکے کے نتیجے میں پولیس اہلکاروں سمیت تین افراد زخمی ہوگئے۔

پولیس ذرائع کا کہنا ہے کہ دھماکے کے زخمیوں کو ٹیچنگ اسپتال خضدار منتقل کیا گیا تاہم 2 دو پولیس اہلکار دم توڑ گئے۔

پولیس کے مطابق ہلاک ہونے والے اہلکاروں کی شناخت محمد دین اور عبدالسلام کے نام سے ہوئی ہے۔

پولیس کے مطابق دھماکا اس وقت ہوا جب پولیس کی گاڑی گشت پر مامور تھی، دھماکے کے فوری بعد سیکیورٹی اداروں نے علاقے کو گھیرے میں لے لیا، تفتیشی افسران بھی جائے وقوعہ پر پہنچ گئے۔

بم ڈسپوزل اسکواڈ نے تصدیق کی ہے کہ دھماکا ریموٹ کنٹرول ڈیوائس کے ذریعے کیا گیا۔

ڈپٹی کمشنر خضدار میجر (ر) محمد الیاس کبزئی بھی اسپتال پہنچ گئے، جنہوں نے زخمیوں کو بہتر علاج فراہم کرنے کی ہدایت کردی۔