خلیجی خطے میں ایک ہزار برطانوی فوجی تعینات، وزیر دفاع کا اعلان

دوحہ (ڈیلی اردو) برطانوی وزیر دفاع جان ہیلی خلیجی خطے کے دورے پر ہیں جہاں انہوں نے تصدیق کی ہے کہ اب تک تقریباً ایک ہزار برطانوی فوجی اہلکار خطے میں تعینات کیے جا چکے ہیں۔ اس تعداد میں قبرص میں تعینات اہلکار بھی شامل ہیں۔

انہوں نے خطے میں اتحادیوں کے لیے اضافی فضائی دفاعی نظام بھیجنے کا اعلان کرتے ہوئے کہا کہ ایران اپنے حملوں میں اضافہ کر رہا ہے اور امکان ہے کہ جنگ مزید کئی ہفتوں تک جاری رہے گی۔

قطر کے دارالحکومت دوحہ میں گفتگو کرتے ہوئے برطانوی وزیر دفاع کا کہنا تھا کہ برطانیہ خلیجی ممالک کے ساتھ کھڑا ہے اور اس کے بہترین اہلکار مشرق وسطیٰ کے فضائی دفاع میں مصروف ہیں۔

جان ہیلی کے مطابق خلیجی ممالک نے ان کے دورے کے دوران آبنائے ہرمز کو کھلا رکھنے کی اہمیت پر زور دیا۔ انہوں نے کہا کہ اس اہم بحری راستے کو فعال رکھنے کے لیے اتحادی مختلف آپشنز پر غور کر رہے ہیں، جس کے لیے امریکہ سمیت دیگر ممالک کے تعاون کی ضرورت ہوگی۔

انہوں نے کسی ٹائم لائن یا مزید تفصیلات فراہم کرنے سے گریز کرتے ہوئے زور دیا کہ خطے میں کشیدگی کم کرنا ضروری ہے۔