خیبر: جمرود میں شدت پسندوں کا ایف سی چیک پوسٹ پر حملہ، ایک اہلکار ہلاک، دوسرا زخمی

اسلام آباد (ش ح ط) صوبہ خیبر پختونخوا کے قبائلی ضلع خیبر کی تحصیل جمرود میں رات گئے فرنٹیئر کانسٹیبلری کے چیک پوسٹ پر شدت پسندوں کے حملے میں ایف سی کا ایک اہلکار ہلاک جبکہ دوسرا شدید زخمی ہوگیا۔

سرکاری ذرائع کے مطابق گزشتہ رات جمرود کے علاقہ گودر میں فرنٹیئر کانسٹبلری (ایف سی) چیک پوسٹ پر شدت پسندوں نے حملہ کر دیا جس میں دو ایف سی اہلکار شدید زخمی ہو گئے۔ بعدازاں ہسپتال میں زخموں کی تاب نہ لاتے ہوئے ایک ایف سی اہلکار ہلاک ہو گیا۔

مقامی افراد کا کہنا تھا کہ اہلکاروں اور شدت پسندوں کے درمیان فائرنگ کا تبادلہ کافی دیر تک جاری رہا۔

واقعے کے فوری بعد سیکیورٹی فورسز نے علاقے کو گھیرے میں لیتے ہوئے سرچ آپریشن شروع کر دیا۔