خیبر: سیکیورٹی فورسز کی گاڑی پر آئی ڈی بم دھماکہ، تین اہلکار ہلاک، دو شدید زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع خیبر کے علاقے برقمبرخیل میں سیکیورٹی فورسز کی گاڑی پر ہونے والے آئی ڈی بم دھماکے میں تین اہلکار ہلاک جبکہ دو شدید زخمی ہو گئے۔

ڈیلی اردو کو پولیس ذرائع نے بتایا کہ تھانہ باڑہ کی حدود میں واقع برقمبرخیل کے علاقے کڑاپہ میں سیکیورٹی فورسز کے قافلے کو نشانہ بنایا گیا۔ دھماکے کے نتیجے میں تین جوان موقع پر ہی ہلاک ہو گئے، جبکہ دو اہلکار شدید زخمی ہوئے۔

پولیس کے مطابق زخمی اہلکاروں کو قریبی اسپتال منتقل کر دیا گیا ہے، جبکہ واقعے کے بعد علاقے میں سرچ آپریشن شروع کر دیا گیا ہے۔ پولیس ذرائع کا کہنا ہے کہ ہلاک ہونے والے اہلکاروں میں عامر، فدا نواز اور واجد خان شامل ہیں۔

دوسری جانب سیکیورٹی فورسز نے دعویٰ کیا ہے کہ علاقے میں جاری سرچ آپریشن کے دوران پانچ شدت پسندوں کو ہلاک کر دیا گیا ہے۔۔