خیبر پختونخوا حکومت کا 26 ہزار لیویز اور خاصہ دار اہلکاروں کو ترقی دینے سے انکار

پشاور (مانیٹرنگ ڈیسک) صوبائی حکومت نے قبائلی اضلاع میں 26 ہزار خاصہ دار اہلکاروں کو ترقی دینے سے انکار کرتے ہوئے واضح کر دیا ہے کہ انہیں محکمہ پولیس میں ضم کرنا ہی ان کی ترقی ہے جب تک معیار کو پورا نہیں کریں گے، ترقی کی تجاویز پر غور نہیں کیا جائے گا۔

بلوچستان عوامی پارٹی کی ایم پی اے بصیرت بیگم کی جانب سے گذشتہ روز صوبائی اسمبلی میں قبائلی اضلاع کے لیویز اور خاصہ دار اہلکاروں کو ترقی نہ دینے کا معاملہ اٹھایا گیا جس میں انہوں نے بتایا کہ ضم اضلاع میں کانسٹیبل سے انسپکٹر تک رینک کے اہلکاروں کی کسی قسم کی ترقی نہیں ہوئی جس کی وجہ سے پولیس میں بے چینی پائی جاتی ہے اس نشاندہی پر مشیر برائے محکمہ داخلہ بابر سلیم سواتی نے موقف اختیار کیا کہ 26 ہزار خاصہ دار اور لیویز اہلکار پولیس میں ضم ہوچکے ہیں۔
لیوی کے سپاہی کا رینک سکیل 5 اور خاصہ دار سکیل ایک میں تھا۔ محکمہ پولیس میں ضم ہونے کی وجہ سے یہ لوگ براہ راست سکیل 7 میں چلے گئے ہیں۔ محکمہ پولیس میں یہ انڈکشن ازخود ان کی ترقی ہے۔

انہوں نے اسمبلی میں رپورٹ پیش کرتے ہوئے بتایا کہ قبائلی اضلاع میں 10 انسپکٹرز، 216 سب انسپکٹرز، 309 اے ایس آئیز، 901 ہیڈ کانسٹیبل، 24 ہزار 553 کانسٹیبل ہیں۔ مجموعی طور پر 26 ہزار لوگوں کی انڈکشن کی گئی ہے جب تک یہ لوگ کرائیٹرین پر پورے نہیں اتریں گے انہیں مزید ترقی نہیں دی جاسکتی ہے۔