خیبر پختونخوا: شمالی وزیرستان سے تین سرکاری ملازمین اغوا

وانا (ل و) صوبہ خیبر پختونخوا کے قبائلی ضلع شمالی وزیرستان میں دہشت گردوں نے پاکستان ٹیلی کمیونیکیشن کمپنی لمیٹڈ (پی ٹی سی ایل) کے تین ملازمین کو اغوا کرلیا ہے۔

سرکاری اور مقامی ذرائع کے مطابق تینوں افراد کو میران شاہ کے ایک گاؤں سے اغوا کیا گیا۔

سرکاری ذرائع کے مطابق مغویوں کو نامعلوم مقام کی جانب منتقل کر دیا گیا ہے۔

مغویوں میں حضرت جابر، صادر اللہ اور گل زادین شامل ہیں۔

پی ٹی سی ایل کے ملازمین کے اغوا کی بھی تاحال سرکاری طور پر باضابطہ تصدیق نہیں کی گئی۔

دوسری جانب ڈیرہ اسماعیل خان میں امن و امان کی بگڑتی صورتحال کے پیش نظر ڈپٹی کمشنر کی جانب سے سرکاری ملازمین کو سیکورٹی ایڈوائزری جاری کی گئی ہے۔

مراسلے میں کہا گیا ہے کہ کالعدم تنظیم سرکاری ملازمین کے اغوا کی پلاننگ کررہی ہے، اس لئے سرکاری ملازمین غیرضروری سفر نہ کریں اور سفر کے لیے ایک ہی راستہ بار بار استعمال نہ کریں، نہ ہی اپنے سفری شیڈول کو کسی کے ساتھ شیئر کریں۔