خیبر پختونخوا میں دہشتگردی کے واقعات، فائرنگ اور دھماکوں میں 2 اہلکار ہلاک، متعدد زخمی

باڑہ/ہنگو/بنوں (ڈیلی اردو) خیبر پختونخوا کے مختلف علاقوں میں دہشتگردی اور فائرنگ کے واقعات پیش آئے ہیں جن میں ایف سی اہلکار اور شہری متاثر ہوئے۔

تفصیلات کے مطابق تیراہ کے نواحی علاقے بر قمبر خیل پر باغ میں نامعلوم سمت سے مارٹر گولہ گرنے سے عادل خان ولد فقیر خان قوم ملک دین خیل زخمی ہو گیا، جنہیں مقامی لوگوں نے فوری طبی امداد کے لئے ہسپتال منتقل کر دیا۔

دوسری جانب ضلع ہنگو کی تحصیل ٹل کے علاقے طورہ وڑی میں ایف سی قلعے پر دہشتگردوں نے حملہ کیا جس کے نتیجے میں 2 اہلکار ہلاک اور 17 زخمی ہوئے۔ پولیس ذرائع کے مطابق ایف سی اور پولیس کی بھرپور جوابی کارروائی کے بعد دہشتگرد فرار ہوگئے جبکہ زخمیوں کو دوآبہ ہسپتال منتقل کر دیا گیا۔ ڈی پی او ہنگو کے مطابق دہشتگردوں کے سہولت کار نے پولیس کو دیکھتے ہی فائرنگ کی تاہم جوابی کارروائی میں سہولت کار ہلاک ہوگیا، ایف سی قلعے پر حملے کے بعد علاقے میں سرچ آپریشن جاری ہے۔

اسی طرح بنوں کے تھانہ غوریوالہ کی حدود چوکی دڑے پل پر نامعلوم موٹر سائیکل سوار دہشتگردوں نے دستی بم حملہ کیا جس کے نتیجے میں نائب انچارج چوکی رفیع اللہ زخمی ہوگئے، جنہیں ڈسٹرکٹ ہیڈ کوارٹر ہسپتال منتقل کیا گیا جہاں ان کی حالت خطرے سے باہر بتائی جاتی ہے۔

مزید برآں بنوں کے علاقے نورڑ میں پولیس اور سی ٹی ڈی نے مشترکہ سرچ اینڈ سٹرائیک آپریشن کیا جس میں کیو آر ایف، آر آر ایف سکواڈ اور سی ٹی ڈی پولیس نے حصہ لیا۔ آپریشن کے دوران مختلف مقامات پر ناکہ بندیاں قائم کر کے مشکوک افراد اور گاڑیوں کی تلاشی لی گئی۔