خیبر پختونخوا میں رواں سال دہشت گردی کے 1588 واقعات رپورٹ

پشاور (نمائندہ ڈیلی اردو) پاکستان کے شورش زدہ صوبے خیبر پختونخوا میں رواں برس دہشت گردی کے واقعات میں نمایاں اضافہ دیکھا گیا ہے، اور سال 2025 کے دوران صوبے بھر میں 1588 کیسز رپورٹ ہوئے ہیں۔ 

صوبائی پولیس کے اعداد و شمار کے مطابق ضلع بنوں ان واقعات میں سب سے زیادہ متاثر رہا۔

پولیس حکام کا کہنا ہے کہ دہشت گردی کے ان واقعات کے سلسلے میں 7000 سے زائد ملزمان کے خلاف ایف آئی آرز درج کی جاچکی ہیں، جن میں کئی ہائی پروفائل مقدمات بھی شامل ہیں۔ 

ان کیسز میں ٹارگٹ کلنگ، بم حملے، آئی ای ڈیز، ریموٹ کنٹرول دھماکے، فورسز پر فائرنگ، بھتہ خوری اور اغواء برائے تاوان کے واقعات شامل ہیں۔

اعداد و شمار کے مطابق جنوبی اضلاع بنوں، لکی مروت، ڈیرہ اسماعیل خان اور ٹانک سکیورٹی صورتحال کے لحاظ سے سب سے زیادہ غیر مستحکم رہے، جہاں شدت پسند گروہوں کی سرگرمیوں میں واضح اضافہ ریکارڈ کیا گیا۔ بنوں میں سب سے زیادہ حملے فورسز، پولیس اور حساس اداروں کی چیک پوسٹوں اور قافلوں کو نشانہ بنایا گیا۔

پولیس کے مطابق شدت پسندوں کے نیٹ ورک کے خلاف انٹیلی جنس بنیادوں پر  متعدد کارروائیاں کی گئیں، جن میں کئی اہم گرفتاریوں اور ٹھکانوں کی تباہی کی اطلاعات بھی شامل ہیں۔ تاہم حکام کا کہنا ہے کہ سرحدی علاقوں میں عسکریت پسندوں کی نقل و حرکت، خصوصاً شمالی وزیرستان اور ملحقہ افغان سرحدی پٹی کے باعث چیلنجز برقرار ہیں۔

سیکورٹی ماہرین کے مطابق گزشتہ برس کی نسبت رواں سال دہشت گردی کے واقعات میں اضافہ تشویشناک ہے، اور اس سے ظاہر ہوتا ہے کہ شدت پسند گروہ صوبے کے مخصوص اضلاع میں دوبارہ منظم ہونے کی کوشش کر رہے ہیں۔ 

ماہرین کا یہ بھی کہنا ہے کہ موثر کوآرڈینیشن، انٹیلی جنس شیئرنگ اور مقامی سطح پر پولیس اور سی ٹی ڈی کی استعداد کار میں اضافہ ناگزیر ہوچکا ہے۔

دوسری جانب، محکمہ پولیس نے کہا ہے کہ دہشت گردی کے کیسز کی تفتیش اور گرفتاریوں میں پیش رفت جاری ہے اور متعدد اہم کیسز جلد حل ہونے کی توقع ہے۔ 

حکام کے مطابق سکیورٹی اداروں نے حساس مقامات پر گشت اور نگرانی مزید سخت کردی ہے۔