خیبر پختونخوا میں سکیورٹی فورسز کے آپریشنز، کمانڈر سمیت 23 دہشت گرد ہلاک

راولپنڈی (ڈیلی اردو) پاکستان کے شورش زدہ صوبہ خیبر پختونخوا میں انٹیلیجنس اطلاعات کی بنیاد پر سیکیورٹی فورسز کے آپریشنز میں ایک اہم کمانڈر سمیت 23 دہشت گرد ہلاک ہوگئے۔

پاکستانی فوج شعبۂ تعلقاتِ عامہ (آئی ایس پی آر) کے مطابق یہ آپریشنز شمالی اور جنوبی وزیرستان اور بنوں سمیت مختلف علاقوں تک توسیع دیے گئے ہیں، جہاں حالیہ دنوں میں دہشت گردوں کے خلاف کئی کارروائیاں کی گئیں۔

آئی ایس پی آر کے مطابق گذشتہ 48 گھنٹوں کے دوران سکیورٹی فورسز اور دہشت گردوں کے درمیان مختلف مقامات پر جھڑپیں ہوئیں، جن میں مزید 23 دہشت گرد ہلاک ہو گئے۔ 

ہلاک ہونے والوں میں ایک اہم کمانڈر جان میر عرف طور ثاقب بھی شامل ہے، جو سکیورٹی فورسز کو مطلوب تھا اور اس کے سر کی قیمت مقرر تھی۔

فوج کے مطابق مارے گئے افراد مختلف دہشت گرد کارروائیوں میں ملوث تھے، جن میں سکیورٹی اہلکاروں اور شہریوں کو نشانہ بنانا بھی شامل تھا۔

بیان میں کہا گیا ہے کہ کارروائیوں کے دوران اسلحہ، گولہ بارود اور دھماکہ خیز مواد بھی برآمد کیا گیا، جبکہ دہشت گردوں کے زیر استعمال سرنگوں اور بنکرز کے نیٹ ورک کو بھی تباہ کر دیا گیا۔

آئی ایس پی آر کا کہنا ہے کہ علاقوں میں مزید کارروائیاں جاری ہیں تاکہ وہاں موجود دہشت گردوں کا مکمل خاتمہ کیا جا سکے، اور ملک میں دہشت گردی کے خاتمے کے لیے مہم جاری رکھی جائے