خیبر پختونخوا میں شدت پسندی سے 5 ماہ میں 65 پولیس اہلکار اور 117 دہشت گرد ہلاک ہوئے، سی ٹی ڈی

پشاور (بیورو رپورٹ) کاؤنٹر ٹیررازم ڈپارٹمنٹ (سی ٹی ڈی) خیبر پختونخوا نے پانچ ماہ کے دوران دہشت گردوں کے خلاف کارروائیوں کے اعداد و شمار جاری کردیے۔

سی ٹی ڈی دستاویز کے مطابق رواں برس خیبر پختونخوا میں 117 انتہائی مطلوب دہشت گرد ہلاک کیے گئے جبکہ 299 دہشت گردوں کو گرفتار کیا گیا۔

دستاویز کے مطابق صوبے کے 26 اضلاع میں دہشت گردی کے 237 واقعات رونما ہوئے، جن میں 65 پولیس اہلکار ہلاک اور 86 اہلکار زخمی ہوئے ہیں۔

کاؤنٹر ٹیررازم ڈپارٹمنٹ کی رپورٹ کے مطابق خیبرپختونخوا میں رواں سال شمالی وزیرستان میں شدت پسندی کے سب سے زیادہ 40 واقعات میں 20 دہشت گرد ہلاک اور 6 گرفتار ہوئے۔

سی ٹی ڈی کے مطابق ڈیرہ اسماعیل خان میں شدت پسندی کے 37 واقعات میں 17 پولیس اہلکار ہلاک اور 14 زخمی ہوئے جبکہ 23 دہشت گرد مارے اور 32 گرفتار کیے گئے۔

سی ٹی ڈی دستاویز کے مطابق ٹانک میں 33 شدت پسندی کے واقعات رونما ہوئے، جن میں 5 پولیس اہلکار ہلاک اور 2 زخمی ہوئے جبکہ 16 دہشت گرد مارے گئے اور 4 گرفتار کیے گئے۔

دستاویز کے مطابق بنوں میں شدت پسندی کے 22 واقعات میں 5 پولیس اہلکار ہلاک اور 9 زخمی ہوئے ہیں جبکہ رواں سال 5 دہشت گرد مارے گئے اور 13 گرفتار کیے گئے۔

سی ٹی ڈی دستاویز کے مطابق لکی مروت میں شدت پسندی کے 18 واقعات میں 5 پولیس اہلکار ہلاک اور 2 زخمی ہوئے جبکہ 9 دہشت گرد مارے گئے اور 8 گرفتار کیے گئے۔

دستاویز کے مطابق جنوبی وزیرستان میں شدت پسندی کے 8 واقعات میں 2 پولیس اہلکار ہلاک اور 3 زخمی جبکہ 8 دہشت گرد دہشت گرد مارے گئے ہیں۔

سی ٹی ڈی دستاویز کے مطابق ہنگو میں 3 شدت پسند گرفتار کیے گئے جبکہ کرک میں شدت پسندی کے 3 واقعات میں 3 دہشت گرد مارے گئے اور 4 گرفتار ہوئے۔

دستاویز کے مطابق باجوڑ میں شدت پسندی کے 14 واقعات میں 11 پولیس اہلکار ہلاک اور 32 زخمی ہوئے جبکہ خیبر میں شدت پسندی کے 22 واقعات میں 8 دہشت گرد مارے گئے اور 12 گرفتارکیے گئے۔

سی ٹی ڈی دستاویز کے مطابق پشاور میں شدت پسندی کے 14 واقعات میں 2 دہشت گرد مارے گئے اور 81 شدت پسند گرفتار کیے گئے جبکہ 7 پولیس اہلکار ہلاک اور 2 زخمی ہوئے۔