خیبر کی وادی تیراہ میں پولیو ورکرز شدت پسندوں کے ہاتھوں اغوا

باڑہ (نمائندہ ڈیلی اردو) صوبہ خیبر پختونخوا کے قبائلی ضلع خیبر کی دور افتادہ وادی تیراہ میں پولیو مہم کے دوران خدمات انجام دینے والے پولیو ورکرز کو شدت پسندوں نے اغوا کر لیا۔ یہ واقعہ ملک دین خیل اور قمبر خیل کے درمیانی علاقے میں پیش آیا، جو وادی تیراہ کے سنگم پر واقع ہے۔

ذرائع کے مطابق شدت پسند موٹر سائیکلوں اور ایک گاڑی میں سوار تھے۔ انہوں نے پولیو ٹیم کے کارکن رحمان گل اور دیگر ورکرز کو زبردستی گاڑی میں بٹھایا اور نامعلوم مقام کی جانب لے گئے۔

واقعے کے بعد سیکیورٹی اداروں نے علاقے میں سرچ آپریشن شروع کر دیا ہے، تاہم تاحال مغوی پولیو ورکرز کا کوئی سراغ نہیں مل سکا۔

واقعے کے بعد علاقے میں خوف و ہراس کی فضا قائم ہو گئی ہے، جبکہ انتظامیہ اور مقامی مشران مغوی ورکرز کی بحفاظت بازیابی کے لیے متحرک ہیں۔