خیبر: وادی تیراہ میں ایک ماہ کے دوران 22 شدت پسند مارے گئے، پاکستانی فوج

راولپنڈی (ک م) پاکستانی سیکورٹی فورسز نے صوبہ خیبر پختونخوا کے قبائلی ضلع خیبر کی دور افتادہ وادی تیراہ میں 14 دسمبر 2024 سے مختلف آپریشنز میں اب تک 22 شدت پسندوں کو ہلاک اور 18 کو زخمی کردیا۔

پاکستانی فوج کے شعبہ تعلقات عامہ (آئی ایس پی آر) سے جاری بیان میں کہا گیا ہے کہ وادی تیراہ میں فورسز اور معصوم شہریوں کے خلاف دہشت گردی کے متعدد واقعات رونما ہوئے جن میں کئی اموات ہوئیں۔

آئی ایس پی آر کے مطابق گھنائونی کارروائیوں کے جواب میں سیکیورٹی فورسز علاقے میں شدت پسندوں کے خلاف وسیع انٹیلی جنس بیسڈ آپریشنز کررہی ہیں، 14 دسمبر 2024 سے جاری مختلف آپریشنز میں فورسز نے 22 خوارجی شدت پسندوں کو ہلاک اور 18 کو زخمی کیا۔

آئی ایس پی آر کا کہنا ہے کہ علاقے میں امن کی بحالی اور شدت ہسندوں کے خاتمے تک آپریشنز جاری رہیں گے، سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔

واضح رہے کہ گزشتہ روز شمالی وزیرستان کے علاقے اسپن وام میں سیکیورٹی فورسز کے آپریشن میں 4 شدت پسند ہلاک ہوگئے تھے۔

واضح رہے کہ منگل کو بھی خیبرپختونخوا کے مختلف علاقوں میں سیکیورٹی فورسز نے 2 مختلف آپریشنز کے دوران 8 شدت پسندوں کو ہلاک کردیا تھا۔

آئی ایس پی آر کے مطابق ٹانک میں شدت پسندوں کی اطلاع پر انٹیلی جنس بیسڈ آپریشن کیا گیا تھا جس میں 6 حملہ آور مارے گئے تھے۔

آئی ایس پی آر کے مطابق سیکیورٹی فورسز نے دوسرا آپریشن قبائلی ضلع خیبر کی دور افتادہ وادی تیراہ میں کیا جس میں 2 شدت پسندوں کو ہلاک کیا گیا تھا۔