خیبرپختونخوا: 65 ڈرون حملے کامیاب، 300 سے زائد ناکام بنائے گئے

پشاور (ڈیلی اردو) پاکستان کے شورش زدہ صوبے خیبر پختونخوا میں سال 2025 میں ڈرون حملوں سے متعلق اہم تفصیلات پولیس دستاویزات کے ذریعے سامنے آئی ہیں۔ 

ریکارڈ کے مطابق صوبے کے مختلف اضلاع میں مجموعی طور پر 65 ڈرون حملے ریکارڈ کیے گئے ہیں۔

دستاویزات کے مطابق سب سے زیادہ ڈرون حملے نارتھ وزیرستان میں ہوئے، جہاں 31 حملے رپورٹ ہوئے۔ بنوں میں 23، باجوڑ میں 5، ساوتھ وزیرستان میں 3 اور ٹانک میں ایک ڈرون حملہ درج کیا گیا۔

پولیس ریکارڈ کے مطابق بنوں میں نصب اینٹی ڈرون سسٹم کے باعث 300 سے زائد ڈرون حملے ناکام بنائے گئے، جسے سیکیورٹی اداروں کی بروقت کارروائی کا نتیجہ قرار دیا گیا ہے۔

تاہم، ڈرون حملوں کے دوران بنوں میں 9 شہری ہلاک اور 33 افراد زخمی ہوئے، جبکہ ان واقعات میں 19 پولیس اہلکار بھی زخمی ہوئے ہیں۔

سیکیورٹی ذرائع نے خبردار کیا ہے کہ ڈرون حملوں میں اضافے سے شہریوں اور قانون نافذ کرنے والے اداروں کو سنگین خطرات لاحق ہیں، جس کے پیش نظر حساس اضلاع میں سیکیورٹی اقدامات مزید سخت کیے جا رہے ہیں۔