خیبرپختونخوا: شمالی وزیرستان اور خیبر میں سیکیورٹی فورسز کے آپریشن، 4 دہشت گرد ہلاک

پشاور (ڈیلی اردو) پاکستانی سکیورٹی فورسز نے صوبہ خیبرپختونخوا میں دو مختلف آپریشنز کے دوران چار دہشت گردوں کو ہلاک کردیا۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ضلع شمالی وزیرستان میں انٹیلی جنس بیسڈ آپریشن کیا گیا اور شدید فائرنگ کے تبادلے کے دوران انصاف اللہ سمیت 2 خوارجی دہشت گردوں کو ہلاک کردیا گیا۔

ترجمان پاک فوج کے مطابق دوسرا آپریشن قبائلی ضلع خیبر میں کہا گیا جس کے دوران بھی 2 خارجی دہشت گرد مارے گئے، اس کارروائی میں 3 دہشت گرد زخمی بھی ہوئے۔

آئی ایس پی آر کے مطابق مارے گئے دہشت گردوں سے اسلحہ اور گولہ بارود بھی برآمد ہوا، جب کہ ہلاک دہشت گرد قانون نافذ کرنے والے اداروں کے ساتھ ساتھ معصوم شہریوں کے خلاف دہشت گردی کی متعدد کارروائیوں میں سرگرم رہے۔