خیبرپختونخوا میں 2400 سرکاری ملازمین دہشتگردوں کے سہولت کار نکلے

پشاور (ڈیلی اردو) پاکستان کے شورش زدہ صوبہ خیبرپختونخوا میں دو ہزار چار سو سرکاری ملازمین کے بارے میں دہشتگردوں کی مبینہ معاونت سے متعلق انکشاف ہوا ہے، جس کے بعد ان کے خلاف تحقیقات کا دائرہ وسیع کر دیا گیا ہے۔

محکمہ داخلہ خیبرپختونخوا نے مبینہ طور پر دہشتگردوں کو سہولت فراہم کرنے والے 2400 سرکاری ملازمین کے خلاف کارروائی کا فیصلہ کرتے ہوئے متعلقہ سرکاری محکموں کو خصوصی ٹاسک سونپ دیا ہے۔

محکمہ داخلہ کی جانب سے دہشتگردوں کی معاونت کے معاملے پر شروع کی گئی تحقیقات کے دوران بعض سرکاری ملازمین کے ملوث ہونے کے شواہد سامنے آنے کا دعویٰ کیا گیا ہے، جس کے بعد حکام نے مزید کارروائی کا آغاز کر دیا ہے۔

سرکاری دستاویزات کے مطابق دہشتگردوں کو سہولت فراہم کرنے والے عناصر کے خلاف سخت قانونی کارروائی عمل میں لائی جائے گی، جبکہ تمام سرکاری محکموں کو اپنے ملازمین کا مکمل ڈیٹا مرتب کرکے آن لائن سافٹ ویئر پر اپ لوڈ کرنے کی ہدایات جاری کر دی گئی ہیں۔

دستاویز میں کہا گیا ہے کہ محکمہ داخلہ نے متعلقہ اداروں کو خصوصی ٹاسک سونپ دیا ہے اور صوبائی ایکشن پلان پر عملدرآمد بھی شروع کر دیا گیا ہے۔ حکام کے مطابق دہشتگردوں کی معاونت میں ملوث سرکاری ملازمین، ٹھیکیداروں اور دیگر افراد کی نشاندہی کا عمل جاری ہے۔

مزید کہا گیا ہے کہ تحقیقات مکمل ہونے کے بعد ملوث ثابت ہونے والے افراد کے خلاف سخت کارروائی کی جائے گی، جبکہ انہیں ملازمت سے برطرف کیے جانے کا بھی امکان ہے۔

محکمہ داخلہ نے ہدایت جاری کی ہے کہ دہشتگردوں کی مبینہ معاونت کرنے والے دو ہزار سے زائد افراد کی شناخت کرکے انہیں باضابطہ طور پر نوٹیفائی کیا جائے۔

دستاویز کے مطابق شناخت ہونے والے سرکاری ملازمین، ٹھیکیداروں اور دیگر افراد کو شیڈول فور میں شامل کرنے کی ہدایت بھی جاری کی گئی ہے۔

سرکاری حکام کا کہنا ہے کہ صوبے میں امن و امان کی صورتحال کو مزید مؤثر بنانے اور دہشتگردی کے نیٹ ورکس کے خلاف کارروائیوں کو تیز کرنے کے لیے اقدامات میں تیزی لائی جا رہی ہے۔