خیبرپختونخوا میں 7 ماہ کے دوران ڈرون حملوں کے 55 واقعات رپورٹ

پشاور (ڈیلی اردو ) پاکستان کے شورش زدہ صوبہ خیبرپختونخوا میں گزشتہ 7 ماہ کے دوران کواڈکاپٹر حملوں کے 55 واقعات رپورٹ ہوئے ہیں، جن میں متعدد افراد ہلاک اور زخمی ہوئے۔

خیبرپختونخوا پولیس کی جانب سے جاری اعداد و شمار کے مطابق اکتوبر 2025 سے مئی 2026 تک صوبے کے مختلف اضلاع میں کواڈکاپٹرز کے ذریعے 55 حملے رپورٹ ہوئے ہیں۔

پولیس رپورٹ کے مطابق زیادہ تر حملے بنوں، شمالی وزیرستان، جنوبی وزیرستان، باجوڑ، ٹانک اور ضلع خیبر میں پیش آئے۔ متعدد واقعات میں مساجد، مدارس، اسکولوں، گھروں، چیک پوسٹوں اور عوامی اجتماعات کو نشانہ بنایا گیا۔

رپورٹ میں کہا گیا ہے کہ بعض حملوں میں بچوں سمیت شہریوں کے زخمی اور ہلاک ہونے کی اطلاعات بھی موصول ہوئیں۔

پولیس ڈیٹا کے مطابق بکا خیل، جانی خیل، موسیٰ خیل، وادیٔ تیراہ اور ماموند ان علاقوں میں شامل ہیں جہاں کواڈکاپٹر حملوں کے زیادہ واقعات رپورٹ ہوئے۔

رپورٹ کے مطابق بعض حملوں میں سیاسی شخصیات، قبائلی عمائدین اور سیکیورٹی سے متعلق مقامات کو بھی نشانہ بنایا گیا، جبکہ شادی کی تقریبات، کرکٹ میچز اور رہائشی کمپاؤنڈز پر حملوں کا بھی ذکر کیا گیا ہے۔

پولیس کا کہنا ہے کہ قبائلی اضلاع میں ہونے والے بیشتر کواڈکاپٹر حملوں کے پیچھے خطے میں سرگرم شدت پسند گروہوں کے ملوث ہونے کا شبہ ہے۔ کالعدم تحریک طالبان پاکستان (ٹی ٹی پی) نے ان حملوں کی ذمہ داری کھلے عام قبول نہیں کی، تاہم “آئی ایم پی” نامی گروہ نے بعض حملوں میں مبینہ طور پر اپنے کردار کا اعتراف کیا۔

رپورٹ میں مزید کہا گیا ہے کہ “مجلسی عسکری کاروان” نامی گروہ نے 11 مئی 2026 کو جانی خیل میں ہونے والے کواڈکاپٹر حملے کی پہلی بار ذمہ داری قبول کی۔