خیبرپختونخوا: کرک میں کواڈ کاپٹر حملہ، 7 پولیس اہلکار زخمی

واشنگٹن (ڈیلی اردو رپورٹ) پاکستان کے شورش زدہ صوبہ خیبرپختونخوا کے ضلع کرک میں دہشت گردوں نے کواڈ کاپٹر کے ذریعے پولیس اہلکاروں کو نشانہ بنایا، جس کے نتیجے میں 7 پولیس اہلکار زخمی ہو گئے۔

پولیس کے مطابق واقعہ تھانہ خرم محمد زئی کی حدود درگہ شہیدان میں پیش آیا، جہاں پولیس اور سیکیورٹی فورسز دہشت گردوں کے خلاف مشترکہ آپریشن میں مصروف تھیں۔ اسی دوران دہشت گردوں نے کواڈ کاپٹر کے ذریعے دھماکا خیز مواد گرا کر اہلکاروں پر حملہ کیا۔

حملے کے نتیجے میں 7 پولیس اہلکار زخمی ہوئے، جنہیں فوری طور پر قریبی ہسپتال منتقل کر دیا گیا۔ 

ہسپتال ذرائع کے مطابق زخمی اہلکاروں کو طبی امداد فراہم کی گئی ہے اور تمام اہلکاروں کی حالت خطرے سے باہر اور مستحکم بتائی جاتی ہے۔

واقعے کے بعد سیکیورٹی فورسز اور پولیس نے علاقے کو گھیرے میں لے کر سرچ اور کلیئرنس آپریشن شروع کر دیا ہے۔ ذرائع کا کہنا ہے کہ حملے میں ملوث دہشت گردوں کی تلاش جاری ہے اور علاقے میں سیکیورٹی مزید سخت کر دی گئی ہے۔

پولیس حکام کے مطابق دہشت گردوں کی جانب سے کواڈ کاپٹر کا استعمال اس بات کی نشاندہی کرتا ہے کہ وہ جدید طریقوں سے سیکیورٹی فورسز کو نشانہ بنانے کی کوشش کر رہے ہیں، تاہم فورسز دہشت گردی کے خاتمے کے لیے اپنی کارروائیاں جاری رکھیں گی۔

سیکیورٹی ذرائع کا کہنا ہے کہ علاقے میں موجود تمام ممکنہ خطرات کے خاتمے اور دہشت گردوں کی گرفتاری کے لیے آپریشن تاحال جاری ہے۔