درہ آدم خیل میں دہشت گردوں کا حملہ، پولیس اہلکار ہلاک، حوالدار زخمی

پشاور + کوہاٹ (نمائندگان ڈیلی اردو) پاکستان کے شورش زدہ صوبے خیبر پختون خوا کے صدر مقام پشاور کے علاقے بڈہ بیر اور قریبی قبائلی علاقے درہ آدم خیل میں سکیورٹی فورسز پر دہشت گردوں کے حملے میں ایک پولیس اہلکار ہلاک جبکہ ایک فرنٹیئر کانسٹیبل زخمی ہوگیا۔

ضلع کوہاٹ کے قبائلی علاقے درہ آدم خیل میں واقع چوکی پر فجر سے قبل اندھیرے کا فائدہ اٹھاتے ہوئے دہشت گردوں نے اچانک حملہ کیا۔ حملے کے نتیجے میں پولیس کانسٹیبل حضرت عمر ہلاک ہوگئے جبکہ فرنٹیئر کانسٹیبلری کا حوالدار بہادر خان زخمی ہوا۔

سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ زخمی حوالدار کو فوری طور پر قریبی اسپتال منتقل کیا گیا جہاں ان کو طبی امداد فراہم کی جارہی ہے۔ ہلاک ہونے والے اہلکار کی جسد خاکی کو بعدازاں کوہاٹ پولیس لائن منتقل کیا گیا، جہاں پولیس کے اعلی افسران اور اہلکاروں کی موجودگی میں نماز جنازہ ادا کی گئی۔

دوسری جانب دیر لوئر کی تحصیل لعل قلعہ میدان میں میراجان خوڑ کے قریب سکیورٹی فورسز کی گاڑی پر آئی ای ڈی دھماکہ ہوا۔ خوش قسمتی سے اس دھماکے میں کسی قسم کا جانی نقصان نہیں ہوا۔

پولیس اور سکیورٹی فورسز نے علاقے میں ہائی الرٹ جاری کر دیا ہے اور مزید حملوں کی روک تھام کے لیے سرچ آپریشنز کو تیز کر دیا گیا ہے۔