دہشتگردی کے خلاف اینٹی ڈرون ٹیکنالوجی کا عملی آغاز، بنوں آپریشن میں پہلی کامیاب آزمائش

پشاور / بنوں (ڈیلی اردو) خیبرپختونخوا پولیس نے دہشتگردی کے بدلتے ہوئے ہتھکنڈوں کے توڑ کے لیے جدید ٹیکنالوجی کا سہارا لیتے ہوئے اینٹی ڈرون سسٹم کا باقاعدہ استعمال شروع کر دیا ہے، جو نہ صرف سیکیورٹی آپریشنز کو مؤثر بنانے میں مدد دے گا بلکہ دشمن کے فضائی حملوں کا بروقت سدباب بھی ممکن بنائے گا۔

پولیس ترجمان کے مطابق سینٹرل پولیس آفس پشاور کی جانب سے اس جدید ٹیکنالوجی کا آغاز صوبے بھر میں دہشتگردوں کی کارروائیوں کا مؤثر جواب دینے کے لیے کیا گیا ہے۔ اس سلسلے میں بنوں میں جاری حالیہ سیکیورٹی آپریشن کے دوران پہلی بار "اینٹی ڈرون گن" کا کامیاب استعمال کیا گیا، جس کے مثبت نتائج حاصل ہوئے۔ یہ جدید ہتھیار پشاور سے بنوں پولیس کو فراہم کیا گیا تھا تاکہ دہشتگردوں کی فضائی نقل و حرکت اور ممکنہ ڈرون حملوں کو ناکام بنایا جا سکے۔

حکام کا کہنا ہے کہ ابتدائی کامیابی کے بعد اینٹی ڈرون سسٹمز خیبرپختونخوا کے جنوبی اضلاع کو بھی فراہم کیے جا رہے ہیں تاکہ حساس علاقوں میں دہشتگردی کے خلاف جاری کارروائیوں کو مزید موثر اور محفوظ بنایا جا سکے۔

پولیس ذرائع کے مطابق یہ اقدام نہ صرف سیکیورٹی اداروں کی عملی صلاحیت کو بڑھائے گا بلکہ دہشتگردوں کی ٹیکنالوجی پر مبنی کارروائیوں کا موثر توڑ بھی فراہم کرے گا۔ اینٹی ڈرون ٹیکنالوجی کے استعمال سے فضائی خطرات پر قابو پانے کے ساتھ ساتھ زمینی کارروائیوں میں بھی برتری حاصل کی جا سکے گی، جس سے دہشتگردوں کے حوصلے پست ہوں گے اور امن و امان کی صورتحال میں بہتری آئے گی۔