راولپنڈی کے علاقے چکری میں سی ٹی ڈی کے مبینہ مقابلے میں تین دہشت گرد ہلاک

راولپنڈی (ڈیلی اردو) پاکستان کے صوبہ پنجاب کے ضلع راولپنڈی کے پہاڑی علاقے چکری کے قریب کاؤنٹر ٹیررازم ڈپارٹمنٹ (سی ٹی ڈی) اور دہشتگردوں کے درمیان فائرنگ کے تبادلے میں کالعدم۔تنظیم کے 3 دہشتگرد ہلاک اور 2 فرار ہوگئے۔

ترجمان سی ٹی ڈی کے مطابق فورس نے دہشتگردوں کی گرفتاری کیلئے انٹیلیجنس کی بنیاد پر کارروائی کی، اس دوران دہشتگردوں نے سی ٹی ڈی ٹیم پر فائرنگ کردی۔

ترجمان نے دعوی کیا کہ تینوں دہشتگرد اپنے ہی ساتھیوں کی فائرنگ سے ہلاک ہوگئے۔

ترجمان سی ٹی ڈی کا کہنا تھا کہ دہشتگردوں سے خودکش جیکٹ، سیفٹی فیوز وائر، رائفلیں، آئی ای ڈی بم، گولیاں، بارودی مواد برآمد کیا گیا۔

سی ٹی ڈی ترجمان کا کہنا تھا کہ سی ٹی ڈی ٹیموں نے چکری کے قریب ناکہ بندی کرلی ہے، فرار دہشت گردوں کی گرفتاری کیلئے سرچ آپریشن جاری ہے۔

سی ٹی ڈی نے کہا کہ ہلاک دہشتگردوں کی شناخت کا عمل جاری ہے، دہشتگرد راولپنڈی پر بڑے حملے کی منصوبہ بندی مکمل کر چکے تھے۔