رحیم یارخان موٹروے پر گاڑی میں آتشزدگی، ایک ہی خاندان کے 4 افراد ہلاک، 3 شدید زخمی

رحیم یار خان (ڈیلی اردو/آن لائن ) صوبہ پنجاب کے ضلع رحیم یارخان میں موٹروے 5 پر تیز رفتار کار الٹنے کے بعد اس میں آگ لگ گئی جس سے کار میں سوار ایک ہی خاندان کے 4 افراد ہلاک اور 3 شدید زخمی ہوگئے ہیں۔

ریسکیو ذرائع کے مطابق حادثہ ملتان سکھر موٹر وے 5 پر ترنڈہ محمد پناہ انٹر چینج کے قریب پیش آیا جہاں بدنصیب خاندان کی کار تیز رفتاری کے دوران بے قابو ہو کر الٹ گئی اور اس میں آگ لگ گئی۔

کار میں آگ کے باعث 2 بچوں اور خاتون سمیت 4 افراد جھلس کر ہلاک ہوگئے جبکہ 2 خواتین اور 1 بچے سمیت 3 افراد شدید زخمی ہیں۔

ذرائع کے مطابق زخمیوں کو شیخ زید ہسپتال کے برن یونٹ میں منتقل کیا گیا ہے جہاں 2 خواتین کی حالت تشویشناک بتائی جاتی ہے۔

واضح رہے کہ بدنصیب خاندان بہاول پور سے رحیم یار خان آ رہا تھا۔