پاکستان کا مقامی طور پر تیار کردہ فضا سے فضا میں مار کرنے والے میزائل ’فاز‘ کا کامیاب تجربہ کرنے کا دعویٰ

اسلام آباد (ڈیلی اردو) پاکستان کے فوجی حکام نے ملک میں تیار کردہ پہلے فضا سے فضا میں مار کرنے والے میزائل ’فاز‘ کے کامیاب تجربے کا اعلان کیا ہے۔ حکام کے مطابق یہ پیش رفت پاکستان کی فضائی دفاعی صلاحیتوں اور دفاعی ٹیکنالوجی میں خود انحصاری کی جانب اہم قدم ہے۔

پاک فوج کے شعبہ تعلقات عامہ کے مطابق فاز میزائل جدید ٹرمینل گائیڈنس نظام سے لیس ہے اور طویل فاصلے پر موجود فضائی اہداف کو نشانہ بنانے کی صلاحیت رکھتا ہے۔ اس نظام کی بدولت پاکستان فضائیہ کی جنگی اور آپریشنل استعداد میں اضافے کی توقع ہے۔

سرکاری بیان میں کہا گیا ہے کہ میزائل کی تیاری اور کامیاب تجربہ ملکی دفاعی صنعت کی تکنیکی صلاحیتوں کا مظہر ہے۔ سول اور عسکری قیادت نے اس پیش رفت کو قومی دفاعی صلاحیتوں کے فروغ اور دفاعی شعبے میں خود انحصاری کے لیے اہم سنگِ میل قرار دیا ہے۔

تاہم میزائل کے تجربے کی تاریخ، مقام، عملی حد، رفتار، ہدف کو نشانہ بنانے کی درستگی اور اس کی تیاری میں شامل اداروں سے متعلق تفصیلات تاحال جاری نہیں کی گئیں۔ ان خصوصیات کی آزادانہ تکنیکی تصدیق بھی سامنے نہیں آئی۔