روس کے یوکرین بھر میں درجنوں میزائل اور 300 ڈرون حملے

ماسکو/کییف (ڈیلی اردو) روس نے اتوار کو یوکرین بھر میں درجنوں میزائل اور ڈرون حملے کیے، جن میں توانائی اور ریلوے انفراسٹرکچر کے ساتھ ساتھ رہائشی عمارتیں بھی نشانہ بنیں۔

دارالحکومت کییف حالیہ چند ہفتوں سے شدید روسی حملوں کا سامنا کر رہا ہے۔ یوکرینی صدر ولودیمیر زیلنسکی نے سوشل میڈیا پر لکھا، ’’ماسکو سفارت کاری سے زیادہ حملوں میں انویسٹ کر رہا ہے۔‘‘ انہوں نے بتایا کہ رات بھر تقریباً 50 میزائل اور 300 ڈرون فائر کیے گئے۔

ان کا مزید کہنا تھا، ’’حملوں کا بنیادی ہدف توانائی کا شعبہ تھا۔ عام رہائشی عمارتیں بھی متاثر ہوئیں اور ریلوے نظام کو بھی نقصان پہنچا ہے۔‘‘

یہ شدید حملے اس دن سامنے آئے، جب ہنگری نے کہا کہ وہ روس کے خلاف یورپی یونین کے تازہ ترین پابندیوں کے پیکج کو روک دے گا، جب تک کہ یوکرین تیل کی اس اہم پائپ لائن کو دوبارہ فعال نہ کر دے، جو ہنگری کو روسی توانائی فراہم کرتی ہے۔

یوکرین کی نیشنل پولیس کے مطابق کییف اور اس کے نواح میں رات گئے ہونے والے حملوں میں ایک شخص ہلاک اور درجن بھر زخمی ہوئے، جن میں چار بچے بھی شامل ہیں۔

روسی فوج نے کہا ہے کہ اس نے یوکرینی فوج کے استعمال میں آنے والی تنصیبات کو نشانہ بنایا۔ یوکرین پر روسی بمباری میں بیلسٹک اور کروز میزائل شامل تھے۔ یوکرین کی وزارت توانائی نے بتایا کہ حملوں کے بعد چھ مشرقی اور جنوب مشرقی علاقوں میں بجلی معطل ہو گئی ہے۔

ادھر روسی حکام نے بتایا کہ روس کے مغربی علاقے بیلگوروڈ میں یوکرینی ڈرون حملے میں دو افراد ہلاک ہوئے۔