روس یوکرین پر حملے جاری رکھے گا، کریملن

ماسکو (ڈیلی اردو/روئٹرز) کریملن نے کہا ہے کہ روس یوکرین کے خلاف اپنی فوجی کارروائیاں آئندہ بھی جاری رکھے گا۔ یہ بیان ایسے وقت میں سامنے آیا ہے جب روس نے ماسکو کے قریب واقع ایک اہم آئل ریفائنری پر حالیہ یوکرینی ڈرون حملے کی تصدیق کی ہے۔

نیوز ایجنسی روئٹرز کے مطابق یوکرین نے ایک روز قبل ماسکو کے مضافات میں واقع ایک بڑی آئل ریفائنری کو ڈرون حملے کا نشانہ بنایا، جس کے نتیجے میں ریفائنری میں آگ بھڑک اٹھی اور اس کی پیداوار عارضی طور پر معطل کرنا پڑی۔ مذکورہ ریفائنری ماسکو کو صاف شدہ تیل کی فراہمی میں اہم کردار ادا کرتی ہے۔

روس عموماً یوکرین کی جانب سے اپنے اندر کیے گئے حملوں کی تفصیلات جاری کرنے سے گریز کرتا ہے، تاہم اس بار کریملن نے حملے کی تصدیق کرتے ہوئے کہا ہے کہ نقصان کا جائزہ لیا جا رہا ہے اور مرمت و بحالی کے اقدامات شروع کر دیے گئے ہیں۔

کریملن کے ترجمان دمتری پیسکوف نے جمعے کو صحافیوں سے گفتگو کرتے ہوئے کہا کہ روس یوکرین کے خلاف اپنی فوجی کارروائیاں جاری رکھے گا۔

جب ان سے پوچھا گیا کہ آیا روسی صدر ولادیمیر پوٹن نے آئل ریفائنری میں لگنے والی آگ کی ویڈیوز دیکھی ہیں، تو پیسکوف نے براہِ راست جواب دینے کے بجائے کہا کہ صحافیوں کو ان یوکرینی شہروں کی تصاویر بھی دیکھنی چاہییں جنہیں روسی افواج نے اپنی کارروائیوں کے دوران نشانہ بنایا ہے۔

روس اور یوکرین کے درمیان جنگ میں حالیہ مہینوں کے دوران ڈرون حملوں میں نمایاں اضافہ دیکھا گیا ہے، جہاں یوکرین روس کے اندر فوجی اور توانائی کے بنیادی ڈھانچے کو نشانہ بنا رہا ہے، جبکہ روس یوکرین بھر میں فضائی اور میزائل حملے جاری رکھے ہوئے ہے۔