رومانیہ کا روسی قونصل جنرل کو ملک بدر اور قونصل خانہ بند کرنے کا اعلان

 بخارسٹ (ڈیلی اردو/روئٹرز) رومانیہ نے روسی قونصل جنرل کو ملک بدر کرنے اور روسی قونصل خانہ بند کرنے کا اعلان کر دیا ہے۔ حکام کے مطابق یہ فیصلہ حالیہ سیکیورٹی خدشات اور روس کے ساتھ بڑھتی کشیدگی کے تناظر میں کیا گیا ہے۔

خبر رساں ادارے روئٹرز کے مطابق رومانیہ کے صدر نیکوشور دان نے ملک کے مشرقی شہر گالاتسی میں رہائشی عمارت سے روسی ڈرون ٹکرانے اور دو افراد کے زخمی ہونے کے ردِ عمل میں کونستانتسا شہر میں تعینات روسی قونصل جنرل کو ملک بدر کرنے اور قونصل خانے کو بند کرنے کا اعلان کر دیا ہے۔

خبر رساں ادارے اے ایف پی کے مطابق روسی قونصل جنرل کو ’پرسونا نان گراٹا‘ (ناپسندیدہ شخصیت) قرار دیا جا چکا ہے۔

دوسری جانب صدر ولادیمیر پوتن کے ترجمان کا کہنا ہے کہ صدر رومانیہ میں پیش آنے والے ڈرون حادثے سے ’آگاہ‘ ہیں۔

روس کی سرکاری خبر رساں ایجنسی طاس کے مطابق ملک کی وزارتِ خارجہ جلد ہی روسی قونصل جنرل کو ’پرسونا نان گراٹا‘ قرار دیے جانے پر اپنا ردِعمل دے گی۔

عمارت سے روسی ڈرون ٹکرانے کا واقعہ جمعے کے روز رومانیہ کے مشرقی شہر گالاتسی میں پیش آیا، جو یوکرین کی سرحد کے قریب واقع ہے۔ 

رومانیہ کی وزارتِ خارجہ نے اس واقعے کو روس کی جانب سے ’سنگین اور غیر ذمہ دارانہ اشتعال انگیزی‘ قرار دیا ہے۔

رومانیہ کے ریسکیو حکام کے مطابق دو افراد کو معمولی زخم آنے کے بعد طبی امداد فراہم کی گئی، جبکہ تقریباً 70 افراد کو عمارت سے محفوظ مقام پر منتقل کیا گیا۔ بعد ازاں امدادی ٹیموں نے آگ پر قابو پا لیا۔

یوکرین کے ساتھ چار سال سے جاری جنگ کے دوران یہ پہلا موقع نہیں کہ جب روسی ڈرون نیٹو رکن ملک رومانیہ کی حدود میں داخل ہوئے ہوں، تاہم یہ پہلا واقعہ ہے جس میں رومانیہ کے شہری زخمی ہوئے ہیں۔

رومانیہ کی فضائی حدود میں ڈرونز کی موجودگی کا پتا چلنے کے بعد دو ایف-16 لڑاکا طیارے تعینات کیے گئے تھے۔ رومانیہ صدر کے مطابق حالات ایسے نہیں تھے کہ شہریوں کی سلامتی کو مزید خطرے میں ڈالے بغیر ہدف کو تباہ کیا جا سکے۔

انھوں نے مزید بتایا کہ انھوں نے اتحادی ممالک سے اضافی اینٹی ڈرون دفاعی صلاحیتوں کی باضابطہ درخواست بھی کی ہے۔