سانحہ آرمی پبلک سکول کو پانچ سال مکمل، پوری قوم کا غم آج بھی تازہ

پشاور (ڈیلی اردو) سانحہ آرمی پبلک سکول پشاور کے شہدا کی پانچویں برسی آج منائی جا رہی ہے۔ سانحے میں شہید ہونے والے اپنے پیاروں کی یاد میں والدین اور پوری قوم کی آنکھیں آج بھی پرنم ہیں۔

اس دن کی مناسبت سے ملک بھر میں خصوصی دعائیہ تقریبات انعقاد ہوگا جن میں شہدا کی روح کو ایصال ثواب کے لئے فاتحہ اور قرآن خوانی جاری ہے۔ دسمبر کا مہینہ شروع ہوتے ہی 16 کی تاریخ ذہن میں تازہ ہو جاتی ہے، جب انسانیت کے دشمنوں نے پشاور میں آرمی پبلک سکول کو مقتل گاہ میں بدل دیا تھا۔

16 دسمبر سال 2014ء کا روز، تاریخ میں سیاہ ترین دن کے نام سے یاد کیا جاتا ہے۔ جب سفاک دہشت گردوں نے پشاور کے آرمی پبلک اسکول میں وحشت اور بربریت کی انتہا کر دی اور 150 گھروں میں صف ماتم بچھا دی گئی۔

سانحہ اے پی ایس نے ملک سمیت دنیا بھر کے کروڑوں انسانوں کی آنکھوں کو نم کر دیا۔ شہدا میں ایک پرنسپل اور 16 سٹاف ممبرز سمیت 134 طلبہ شامل تھے۔ پانچ سال پورے ہونے کے بعد آج بھی بچھڑنے والوں کا غم اسی طرح تروتازہ ہے۔

آرمی پبلک سکول شہدا کے والدین سانحہ کے نفسیاتی اثرات سے نہیں نکل سکے۔ دسمبر کا مہینہ آتے ہی ان کا غم دوبارہ لوٹ آتا ہے۔

16 دسمبر کے ہولناک سانحے میں شہید ہونے والے منوں مٹی تلے سو گئے لیکن ان کی یادیں آج بھی پہلے دن کی طرح تازہ ہیں۔ شہید بچوں کے والدین کیلئے دن جیسے تھم سے گئے ہیں۔ ان کی یادیں، شرارتیں اور اشیا آج بھی اسی طرح سنبھال کر رکھیں گئی ہیں۔ سانحہ اے پی ایس جہاں کئی گھر اجاڑ گیا، وہیں ایسے بھی طالب علم ہیں جو اس سانحہ میں بچ جانے کے بعد آج زندگی کی جانب واپس لوٹ آئے ہیں اور ان کے حوصلے بھی بلند ہیں۔

اس موقع پر شرکاء کا کہنا تھا کہ سانحہ اے پی ایس کے بچوں کی شہادتیں ہمیشہ یاد رکھی جائے گی۔ پانچ سال گزر گئے لیکن آج بھی ہمیں اپنے بچے یاد ہیں۔

شرکاء کا کہنا تھا کہ غمزدہ خاندانوں کے ساتھ اس غم میں برابر کے شریک ہیں۔ ملک کیلئے قربانی دینے والے بچوں کے نام تاریخ میں سنہری الفاظ میں لکھے جائیں گے اور اس ناقابل تلافی نقصان پر ان کے لواحقین کے صبر و استقامت کو خراج تحسین پیش کرتے ہیں۔

ان کا کہنا تھا کہ ہر 16 دسمبر ہمیں سانحہ اے پی ایس یاد دلاتی ہے کیونکہ اسی دن ملک دشمن عناصر نے ہمارے معصوم بچوں پر سکول میں حملہ کرکے ان کو شہید کیا۔

لواحقین نے واقعہ میں ملوث احسان اللہ احسان جس نے اس سانحہ کے ذمہ داری قبول کی تھی جوکہ اُس وقت طالبان کے ترجمان تھے اور اب حکومت کے زیرحراست ہے کو فوری سزاء دینے کا مطالبہ کیا۔