سعودی عرب، یو اے ای اور کویت پر ایرانی ڈرون حملے، مینا ریفائنری آگ بھڑک اٹھی

کویت سٹی (ڈیلی اردو) کویت نے جمعے کے روز تصدیق کی ہے کہ اس کی مینا الاحمدی آئل ریفائنری ایک بار پھر ایرانی ڈرون حملے کا نشانہ بنی، جس کے نتیجے میں ریفائنری کے متعدد یونٹس میں آگ بھڑک اٹھی۔ کویتی حکام کے مطابق فائر فائٹرز آگ پر قابو پانے کی کوششوں میں مصروف ہیں اور تاحال کسی جانی نقصان کی اطلاع موصول نہیں ہوئی۔

ایرانی سرکاری ٹی وی نے اس حملے کی تصدیق کی ہے، تاہم کسی جانب سے ذمہ داری قبول نہیں کی گئی۔ یہ حملہ ایسے موقع پر ہوا جب کویت میں عید الفطر منائی جا رہی تھی، جس سے خطے میں کشیدگی اور بڑھ گئی ہے۔

ماہرین کے مطابق، خلیج میں توانائی تنصیبات پر بڑھتے ہوئے ڈرون اور میزائل حملے خطے کی سکیورٹی اور توانائی سپلائی کے لیے سنگین خطرہ بن چکے ہیں۔ مینا الاحمدی آئل ریفائنری تقریباً 730,000 بیرل یومیہ تیل صاف کرنے کی صلاحیت رکھتی ہے اور کویت سے توانائی کی سپلائی کا ایک اہم ستون ہے۔

کویت پٹرولیم کارپوریشن کے مطابق، حملے سے متاثرہ یونٹس کو بند کر دیا گیا ہے۔ جنگ کے آغاز کے بعد سے کویت اپنی تیل کی برآمدات مؤثر انداز میں برقرار نہیں رکھ سکا، کیونکہ یہ ملک اپنی پرآمدی ترسیل کے لیے خلیج فارس اور آبنائے ہرمز کے بحری راستوں پر انحصار کرتا ہے، جو مسلسل ایرانی حملوں کا ہدف بن رہے ہیں۔

خلیج کے دیگر ممالک میں بھی ڈرون اور میزائل حملوں کی اطلاعات سامنے آ رہی ہیں۔ سعودی عرب کی وزارتِ دفاع نے کہا کہ ملک کے مشرقی حصے میں چھ ڈرونز کو مار گرایا گیا، جبکہ متحدہ عرب امارات کے حکام نے بتایا کہ شہر کے بعض حصوں میں سنے جانے والے دھماکے کامیاب فضائی دفاعی کارروائیوں کا نتیجہ تھے۔

متحدہ عرب امارات کی وزارتِ دفاع نے واضح کیا کہ وہ ایران کی جانب سے آنے والے میزائل اور ڈرون حملوں کا مسلسل مقابلہ کر رہی ہے، جبکہ کویت کی وزارتِ دفاع نے بھی کہا کہ وہ دشمن کے میزائل اور ڈرون حملوں سے نمٹ رہی ہے۔

ماہرین کا کہنا ہے کہ ایران کی جانب سے اسرائیل کی ساؤتھ پارس گیس فیلڈ پر بمباری کے جواب میں خلیجی ممالک کی توانائی تنصیبات کو مسلسل نشانہ بنایا جا رہا ہے، جس سے خطے میں توانائی اور سکیورٹی کی صورتحال مزید کشیدہ ہو گئی ہے۔