سندھ: حیدرآباد میں سی ٹی ڈی کی کارروائی، ایس آر اے کے 3 دہشت گرد گرفتار

حیدرآباد (ڈیلی اردو) صوبہ سندھ کے ضلع حیدرآباد میں کاؤنٹر ٹیررازم ڈیپارٹمنٹ (سی ٹی ڈی) نے کوٹری کے قریب بھولاری ریلوے ٹریک کے نزدیک کارروائی کرتے ہوئے تین خطرناک دہشت گرد گرفتار کر لیے۔ گرفتار ملزمان سے اسلحہ، بارودی مواد اور حساس ہتھیار برآمد ہوئے ہیں۔

ترجمان سی ٹی ڈی کے مطابق گرفتار دہشت گردوں میں شیر علی رند، معشوق رند اور حنیف بھٹ شامل ہیں، جو کالعدم تنظیم سندھ ریجمینٹل آرمی (SRA) سے تعلق رکھتے ہیں۔

انچارج سی ٹی ڈی آصف حیات نے بتایا کہ گرفتار دہشت گرد ریلوے ٹریک کے قریب بڑی تخریب کاری کی منصوبہ بندی کر رہے تھے۔ ملزمان کے قبضے سے ممنوعہ بور کا اسلحہ، 8 ایم ایم گن، ہینڈ گرنیڈ، ریموٹ کنٹرول ڈیوائسز اور گولیاں برآمد ہوئی ہیں۔

کارروائی مخفی اطلاع پر قانون نافذ کرنے والے اداروں کے ساتھ مشترکہ آپریشن کے تحت کی گئی۔ مزید تحقیقات میں انکشاف ہوا کہ گرفتار دہشت گرد سجاول سے پنجاب جانے والے ٹرالرز پر فائرنگ کے متعدد کیسز میں بھی مطلوب تھے۔

سی ٹی ڈی حکام کے مطابق ملزمان سے مزید تفتیش جاری ہے اور امکان ہے کہ ان سے مزید اہم انکشافات سامنے آئیں گے۔ یہ کارروائی علاقے میں دہشت گردی کی بڑی سازش ناکام بنانے میں اہم پیش رفت قرار دی جا رہی ہے۔