سوات: مینگورہ میں بنڑ چوکی پر دہشت گردوں کا دستی بموں سے حملہ، پولیس اہلکار ہلاک، دوسرا شدید زخمی

سوات (ڈیلی اردو) صوبہ خیبرپختونخوا کے ضلع سوات کے علاقے مینگورہ میں بنڑ پولیس چوکی پر دہشت گردوں کے حملے میں ایک پولیس اہلکار ہلاک جبکہ دوسرا شدید زخمی ہوگیا۔

ڈسٹرکٹ پولیس آفیسر (ڈی پی او) سوات ڈاکٹر ذاہد اللہ کے مطابق بدھ اور جمعرات کی درمیانی شب رات 4 بجے دہشت گردوں نے مینگورہ میں بنڑ پولیس چوکی پر دستی بموں سے حملہ کیا، جس سے 2 پولیس اہلکار زخمی ہوگئے۔

دونوں زخمی پولیس اہلکاروں کو سیدو شریف ہسپتال منتقل کیا گیا تھا، دوران علاج رحمان اللہ نامی اہلکار زخموں کی تاب نہ لاتے ہوئے دم توڑ گیا جبکہ دوسرا زخمی اہلکار ہسپتال میں زیر علاج ہے۔

ڈی پی او سوات کا کہنا ہے کہ پولیس کی مزید نفری بنڑ چوکی پر پہنچ گئی اور علاقے کو گھیرے میں لے کر شرچ آپریشن شروع کردیا گیا ہے۔