سوڈان میں اقوام متحدہ کے اڈے پر ڈرون حملہ، 6 بنگلہ دیشی فوجی ہلاک، 8 زخمی

نیو یارک (نمائندہ ڈیلی اردو) سوڈان اور جنوبی سوڈان کے متنازعہ علاقے ابیی میں اقوام متحدہ کے ایک اڈے پر ایک ڈرون حملے کے نتیجے میں کم از کم 6 بنگلہ دیشی امن فوجی ہلاک جبکہ 8 دیگر زخمی ہوگئے ہیں۔

بنگلہ دیشی فوج کے شعبہ تعلقات عامہ (آئی ایس پی آر) نے ہلاکتوں کی تصدیق کرتے ہوئے بتایا ہے کہ حملہ غیر شناخت شدہ مسلح گروہوں نے کیا، جنہیں دہشت گرد قرار دیا گیا ہے۔

بیان کے مطابق بنگلہ دیشی دستہ اقوام متحدہ کے عارضی امن فوجی مشن برائے ابیی (UNISFA) کے تحت تعینات تھا، جس کا مقصد اس غیر مستحکم علاقے میں امن و استحکام قائم رکھنا ہے۔ حملے کے حالات اور اقوام متحدہ کے اڈے کو پہنچنے والے نقصان کی تفصیلات تاحال مکمل طور پر سامنے نہیں آ سکیں۔

زخمی امن فوجیوں کو طبی امداد کے لیے قریبی اسپتال منتقل کر دیا گیا ہے، جبکہ علاقے میں اقوام متحدہ کے دیگر مراکز کی سیکیورٹی سخت کر دی گئی ہے۔ حکام کے مطابق علاقے میں جھڑپیں بھی جاری ہیں۔

اقوام متحدہ کے سیکرٹری جنرل انتونیو گوتریس کا سخت ردعمل

اقوام متحدہ کے سیکرٹری جنرل انتونیو گوتریس نے سوڈان کے شہر کادوگلی میں اقوام متحدہ کے امن مشن UNISFA کے لاجسٹکس بیس پر ہونے والے ڈرون حملے کی شدید الفاظ میں مذمت کی ہے۔ انہوں نے حملے میں بنگلہ دیش سے تعلق رکھنے والے 6 امن فوجیوں کے ہلاک اور 8 کے زخمی ہونے کی تصدیق کی ہے۔

انتونیو گوتریس نے اپنے بیان میں کہا کہ وہ بنگلہ دیشی امن فورسز کو نشانہ بنانے والے اس ہولناک حملے کی سخت مذمت کرتے ہیں۔ انہوں نے ہلاک ہونے والے امن فوجیوں کے اہلِ خانہ سے دلی تعزیت کا اظہار کیا اور بنگلہ دیش کی حکومت اور عوام سے مکمل ہمدردی کا اظہار کیا۔

انہوں نے زخمی اہلکاروں کی جلد صحتیابی کے لیے نیک تمناؤں کا بھی اظہار کیا۔

اقوام متحدہ کے سیکرٹری جنرل نے واضح کیا کہ اقوام متحدہ کے امن فوجیوں پر حملے ناقابلِ جواز ہیں اور ایسے واقعات جنگی جرائم کے زمرے میں آ سکتے ہیں۔ انہوں نے تمام فریقین کو یاد دہانی کرائی کہ اقوام متحدہ کے اہلکاروں اور عام شہریوں کا تحفظ بین الاقوامی قانون کے تحت لازم ہے۔

انہوں نے مزید کہا کہ اس حملے کے ذمہ داروں کا احتساب ناگزیر ہے اور اس حوالے سے مؤثر اور شفاف کارروائی ہونی چاہیے۔