سی ٹی ڈی کی پنجاب میں کارروائیاں، 8 دہشت گرد گرفتار، بارودی مواد اور اسلحہ برآمد

لاہور (اے ڈی شہزاد) کاؤنٹر ٹیررازم ڈیپارٹمنٹ (سی ٹی ڈی) نے پنجاب میں مختلف کارروائیوں کے دوران 8 دہشت گرد گرفتار کر لیے۔

ترجمان سی ٹی ڈی کے مطابق صوبے بھر میں کارروائیوں کے دوران 8 دہشت گردوں کو گرفتار کرلیا گیا ہے، گرفتار دہشت گردوں کے قبضے سے بارودی مواد، اسلحہ اور بم بنانے کا دیگر سامان برآمد ہوا ہے۔

ترجمان سی ٹی ڈی کے مطابق لاہور میں کارروائی کے دوران چار دہشت گردوں کو گرفتار کیا گیا، جن کا تعلق کالعدم تنظیم سپاہ صحابہ پاکستان سے ہے، دہشت گردوں کی شناخت مشتاق، سمیع اللہ، عادل جمال اور اسامہ کے نام سے ہوئی ہے۔ گرفتار دہشت گردوں سے بارودی مواد، اسلحہ اور دیگر سامان برآمد ہوا ہے۔

ضلع حافظ آباد سے ممشالی خان نامی دہشت گرد کو گرفتار کیا گیا، ممشالی خان کا تعلق کالعدم تنظیم تحریک طالبان پاکستان سے ہے، گرفتار دہشت گرد کالعدم تنظیم ٹی ٹی پی کے لیے فنڈز اکٹھے کر رہا تھا۔

ضلع گوجرانوالہ سے عبدالرحمان نامی دہشت گرد گرفتار کیا گیا جس کا تعلق کلعدم تنظیم داعش سے ہے۔

ضلع شیخوپورہ سے کاشف محمود اور منصور نامی دہشت گرد گرفتار کئے گئے، لشکر جھنگوی کے گرفتار دہشت گرد وال چاکنگ کے زریعہ فرقہ وارانہ فسادات پھیلانا چاہتے تھے۔