سی ٹی ڈی کی کراچی میں کارروائی، 2 دہشت گرد گرفتار

کراچی (نمائندہ ڈیلی اردو) صوبہ سندھ کے صوبائی دارالحکومت کراچی کے علاقے سچل میں سی ٹی ڈی نے کارروائی کرتے ہوئے کالعدم تنظیم کے دو دہشت گردوں کو گرفتار کرلیا۔

سی ٹی ڈی حکام کا کہنا ہے کہ گرفتار ملزمان کا تعلق کالعدم تنظیم تحریک طالبان پاکستان سے ہے، ان کی شناخت اللہ رکھیو منگی اور یاسر حسن لاشاری کے نام سے ہوئی ہے۔

حکام کے مطابق ملزمان کو ہنڈلرز کی جانب سے پانچ ٹارگٹ دیئے گئے تھے جن کی وہ ریکی مکمل کرچکے تھے۔ ملزمان نے رواں سال مارچ میں قمبر شہدادکوٹ میں فائرنگ کرکے شہری کو زخمی کیا تھا۔

گرفتار ملزمان میں سے ایک ملزم اللہ رکھیو پہلے بھی گرفتار ہوکر جیل جا چکا ہے، ملزمان سے مزید تفتیش جاری ہے۔