سیکرٹ سروس نے نیویارک میں موبائل نیٹ ورک پر بڑے حملے کی سازش ناکام بنا دی

نیویارک (ڈیلی اردو/نیوز ایجنسیاں) امریکی سیکرٹ سروس نے ایک ایسے منظم اور جدید نیٹ ورک کو بے نقاب اور ناکام بنانے کا دعویٰ کیا ہے جو موبائل فون ٹاورز کو غیر فعال کرکے پورے نیویارک شہر کا ٹیلی کمیونیکیشن نظام بند کرسکتا تھا۔ یہ انکشاف ایسے وقت میں ہوا ہے جب اقوام متحدہ کی جنرل اسمبلی کے قیام کے 80 سال مکمل ہونے پر دنیا کے 100 سے زائد عالمی رہنما اور وفود مین ہیٹن میں جمع ہو رہے ہیں۔

سیم کارڈز اور ڈیوائسز کی بھاری تعداد برآمد

ایجنسی کے مطابق چھاپوں کے دوران 300 سے زائد سم سرورز اور ایک لاکھ سم کارڈز برآمد ہوئے ہیں، جو نیویارک، نیو جرسی اور کنیکٹیکٹ کے علاقوں میں ٹیلی کام نیٹ ورک پر حملوں کے لیے استعمال ہوسکتے تھے۔ یہ آلات اقوام متحدہ کی جنرل اسمبلی کے مقام سے تقریباً 56 کلومیٹر کے فاصلے پر خالی عمارتوں میں قائم "سم فارمز" سے ضبط کیے گئے۔

حملے کی صلاحیت اور خدشات

انچارج ایجنٹ میٹ میک کول کے مطابق یہ نیٹ ورک چند منٹوں میں پورے نیویارک شہر میں فون نیٹ ورک کو بند کرسکتا تھا۔ حکام کا کہنا ہے کہ ان آلات سے محض 12 منٹ کے اندر امریکہ کی پوری آبادی کو برقی پیغامات بھیجے جا سکتے تھے، جبکہ ایمرجنسی سروسز کے کمیونیکیشن سسٹمز کو بھی غیر فعال کیا جا سکتا تھا۔

جرائم پیشہ اور دہشت گرد گروہ

سیکرٹ سروس کے بیان میں کہا گیا ہے کہ یہ منصوبہ "منظم اور مالی طور پر مضبوط" تھا اور اس میں ایسے ریاستی عناصر شامل ہیں جن کے بارے میں امریکی قانون نافذ کرنے والے اداروں کو معلومات ہیں۔ میک کول نے صحافیوں کو بتایا کہ ان ریاستی عناصر کے جرائم پیشہ نیٹ ورکس، منشیات کے کارٹلز اور دہشت گرد تنظیموں کے ساتھ روابط پائے گئے ہیں، جو ایک دوسرے کو خفیہ پیغامات بھیجتے ہیں۔

تحقیقات

امریکی میڈیا کے مطابق اس منصوبے کی تفصیلات اس وقت سامنے آئیں جب چند ماہ قبل تین سرکاری عہدیداروں کو گمنام فون کالز کے ذریعے دھمکیاں موصول ہوئیں۔ ان میں سے ایک سیکرٹ سروس میں اور دو وائٹ ہاؤس میں خدمات انجام دے رہے تھے۔ انہی تحقیقات نے چھاپوں اور اس نیٹ ورک کی دریافت کی راہ ہموار کی۔

مزید انکشافات

تفتیش کاروں نے بتایا کہ ان کارروائیوں کے دوران غیر قانونی اسلحہ، 80 گرام کوکین، کمپیوٹرز اور فونز بھی برآمد ہوئے ہیں۔ حکام نے ان مقامات کی درست تفصیلات ظاہر نہیں کیں جہاں سے یہ سامان ضبط ہوا۔

یہ تحقیقات گزشتہ موسمِ بہار میں شروع ہوئی تھیں اور اس کے نتیجے میں گزشتہ ماہ مذکورہ آلات برآمد کیے گئے۔ فی الحال امریکی حکام اس بات کی جانچ کر رہے ہیں کہ آیا یہ سازش براہِ راست کسی غیر ملکی ریاست یا دہشت گرد گروہ کی جانب سے ترتیب دی گئی تھی۔