شام : بارود سے بھری گاڑی میں دھماکہ ، 5 افراد ہلاک، متعدد زخمی

دمشق(ڈیلی اردو) شام کے صوبہ ادلب کے مشرقی دیہی علاقے میں واقع شہر بنش کے مغربی داخلی راستے پر گولہ بارود سے بھری ایک گاڑی میں زور دار دھماکا ہوا، جس کے نتیجے میں پانچ افراد ہلاک اور متعدد زخمی ہوگئے۔

شامی حکام کے مطابق دھماکا منگل کے روز بنش کے مغربی داخلی راستے پر پیش آیا۔ ابتدائی اطلاعات میں ہلاکتوں اور زخمیوں کی مختلف تعداد سامنے آئی، تاہم بعد ازاں ادلب کے محکمہ صحت نے پانچ افراد کی ہلاکت کی تصدیق کی۔

شامی سول ڈیفنس کے مطابق ابتدائی طور پر تین افراد کے ہلاک اور سات کے زخمی ہونے کی اطلاع دی گئی تھی۔ امدادی ٹیموں نے ہلال احمر اور محکمہ صحت کے تعاون سے زخمیوں کو فوری طور پر اسپتال منتقل کیا۔

حکام کے مطابق دھماکے کے بعد امدادی اور سیکیورٹی ٹیموں نے جائے وقوعہ کو محفوظ بنانے کے لیے کارروائیاں شروع کردیں جبکہ علاقے میں موجود شہریوں کی حفاظت کو یقینی بنانے کے لیے بھی اقدامات کیے گئے۔

دھماکے کی نوعیت اور گولہ بارود سے لدی گاڑی کے وہاں موجود ہونے کی وجوہات کے بارے میں حکام کی جانب سے مزید تفصیلات سامنے نہیں آئی ہیں۔ واقعے کی تحقیقات جاری ہیں۔