شام کے ایران اور اسرائیل سے تعلقات، وزیر خارجہ اسعد الشیبانی کا اہم مؤقف

اسلام آباد(ڈیلی اردو) شامی وزیر خارجہ اسعد الشیبانی نے کہا ہے کہ دمشق فی الحال اسرائیل کے ساتھ کسی معاہدے تک پہنچنے کے امکانات نہیں دیکھتا، تاہم ایران کے ساتھ رابطوں کے امکانات موجود ہیں۔

پاکستان کے دورے کے دوران اسلام آباد میں گفتگو کرتے ہوئے اسعد الشیبانی نے کہا کہ ایران کے ساتھ ممکنہ رابطوں سے قبل تہران کو شامی عوام کے خلاف ماضی میں کیے گئے اقدامات کو تسلیم کرنا ہوگا۔ انہوں نے واضح کیا کہ پاکستان نے ابھی شام اور ایران کے درمیان ثالثی کی کوئی پیشکش نہیں کی۔

شامی وزیر خارجہ نے ایران اور امریکا کے درمیان جاری بحران میں پاکستان کے ثالثی کردار کو سراہتے ہوئے کہا کہ اسلام آباد نے کشیدگی کم کرنے کے لیے اہم کردار ادا کیا ہے۔

اسرائیل کے ساتھ تعلقات کے حوالے سے اسعد الشیبانی نے کہا کہ اس وقت کسی اسٹریٹجک معاہدے پر بات کرنا قبل از وقت ہے۔ ان کے مطابق شام کی فوری ترجیح اسرائیلی حملوں کا رکنا ہے۔

انہوں نے کہا کہ شام ایک خودمختار ملک ہے اور اسے اپنی خارجہ پالیسی، تعلقات اور شراکت داریوں کا فیصلہ خود کرنے کا حق حاصل ہے۔ ان کے بقول اسرائیل کو شام کے اتحادیوں یا شراکت داروں کا تعین کرنے کا اختیار نہیں دیا جا سکتا۔

اسعد الشیبانی نے شام میں ابو الظهور ایئربیس کے حوالے سے کہا کہ وہاں کسی ترک فوجی اڈے کے قیام کا منصوبہ نہیں۔ ان کے مطابق ایئربیس کی بحالی کا کام جاری ہے تاکہ اسے شامی فضائیہ استعمال کرسکے۔

دوسری جانب ترکی کا مؤقف ہے کہ ابو الظهور ایئربیس پر اس کی فوجی موجودگی نہیں ہے، جبکہ اسرائیل نے شام میں ممکنہ ترک فوجی موجودگی پر تحفظات کا اظہار کیا ہے۔