شدت پسندوں کے دو الگ حملے: لکی مروت میں گرلز سکول، بنوں میں پل تباہ

پشاور (نمائندگان ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں شدت پسندوں نے گرلز سکول کو دھماکے سے تباہ کر دیا۔ یہ واقعہ تھانہ غزنی خیل کی حدود میں واقع پہاڑ خیل پکہ کے علاقے میں پیش آیا، جہاں نامعلوم شدت پسندوں نے سرکاری گرلز پرائمری سکول کی عمارت کو بارودی مواد سے اڑا دیا۔

مقامی ذرائع کے مطابق مذکورہ سکول گزشتہ تین سالوں سے بند پڑا تھا اور تدریسی سرگرمیاں معطل تھیں۔ دھماکے کے بعد عمارت کو شدید نقصان پہنچا، تاہم کسی جانی نقصان کی اطلاع نہیں ملی۔

ادھر ضلع بنوں کی تحصیل جانی خیل میں بھی شدت پسندوں نے بارودی مواد سے علاقے کا واحد رابطہ پل تباہ کر دیا۔ پل کے منہدم ہونے کے باعث مقامی آبادی کو آمد و رفت میں شدید مشکلات کا سامنا ہے، خصوصاً بیماروں کو اسپتال پہنچانے اور اشیائے ضروریہ کی ترسیل معطل ہو گئی ہے۔

سیکیورٹی ذرائع کا کہنا ہے کہ دونوں واقعات کی تفتیش شروع کر دی گئی ہے، تاہم تاحال کسی تنظیم نے ان حملوں کی ذمہ داری قبول نہیں کی۔

یاد رہے کہ لکی مروت اور جانی خیل کے علاقے حالیہ برسوں میں دہشتگردی اور شدت پسند حملوں کا مرکز رہے ہیں، جہاں سیکیورٹی فورسز اور مقامی آبادی کو بارہا نشانہ بنایا گیا ہے۔