شمالی اور جنوبی وزیرستان میں سیکورٹی فورسز کے آپریشنز، دو عسکریت پسند ہلاک

میرانشاہ/وانا (نمائندگان ڈیلی اردو) پاکستان کے شورش زدہ قبائلی اضلاع میں سیکورٹی فورسز کی کارروائیوں کے دوران دو عسکریت پسند ہلاک ہوگئے۔ حکام کا کہنا ہے کہ یہ کارروائیاں خفیہ اطلاعات کی بنیاد پر کی گئیں تاکہ دہشت گردانہ سرگرمیوں کو محدود کیا جا سکے۔

شمالی وزیرستان

سیکورٹی ذرائع کے مطابق شمالی وزیرستان کے میرعلی-میرا نشاہ روڈ پر سیکیورٹی فورسز نے خفیہ اطلاع پر ٹارگٹڈ آپریشن کیا، جس کے نتیجے میں مطلوب عسکریت پسند محمد گل مارا گیا۔

ذرائع کے مطابق محمد گل علاقے میں مختلف دہشت گردانہ سرگرمیوں میں ملوث تھا اور سیکیورٹی فورسز کے لیے خطرہ تھا۔

جنوبی وزیرستان

جنوبی وزیرستان میں سیکیورٹی فورسز کے گشت کے دوران ایک نامعلوم موٹر سائیکل سوار کو رکنے کا اشارہ کیا گیا، لیکن اس نے فورسز پر فائرنگ شروع کر دی۔

جوابی کارروائی میں موٹر سائیکل سوار ہلاک ہو گیا اور اس کے قبضے سے اسلحہ اور بارود برآمد کیا گیا۔

سیکورٹی ذرائع نے بتایا کہ یہ کارروائیاں قبائلی اضلاع میں امن و امان کی بحالی اور شہریوں کی حفاظت کے لیے کی گئی ہیں۔ ہلاک کیے گئے افراد دہشت گرد نیٹ ورکس کے اہم رکن تھے اور علاقے میں تشدد کے واقعات میں ملوث تھے۔