شمالی وزیرستان میں سرحد پار سے حملہ، پاکستانی فوجی ہلاک

صوبہ خیبر پختونخوا کے قبائلی ضلع شمالی وزیرستان میں سرحد پار سے شدت پسندوں کے حملے میں پاکستانی فوج کا سپاہی ہلاک ہوگیا۔

پاکستانی فوج کے شعبہ تعلقات عامہ آئی ایس پی آر کے مطابق شمالی وزیرستان میں ایک مرتبہ پھر سرحد پار سے شرپسندی کی کوشش کی گئی جس کی زد میں آکر پاک فوج کا سپاہی ہلاک ہوگیا۔

آئی ایس پی آر کے مطابق 32 سالہ سپاہی وقار علی کا تعلق چھوٹا لاہور صوابی سے تھا۔

آئی ایس پی آر نے کہا کہ پاکستان دہشتگردی کی کارروائیوں کے لیے افغان سرزمین استعمال ہونے کی مذمت کرتا ہے اور افغانستان سے موثر بارڈ مینجمنٹ یقینی بنانے کے لیے مسلسل درخواست کررہا ہے۔

پاک فوج شعبہ تعلقات عامہ کا کہنا تھا کہ پاک فوج دہشتگردی سے نمٹنے کے لیے پرعزم ہے، اس قسم کی کارروائیوں سے ہمارا عزم مزید پختہ ہوگا۔